گورنر سندھ عمران اسماعیل نے کہا ہے کہ تعلیم ہر شخص کا بنیادی حق ہے۔

تفصیلات کے مطابق گورنر سندھ عمران اسماعیل سے رونق لاکھانی کی قیادت میں 5 رکنی وفد کی گورنر ہاؤس میں ملاقات ہوئی جس میں وفد نے بینائی سے محروم طلباء کی تعلیم کے لیے ” بولتے حروف “ منصوبوں پر گورنر سندھ عمران اسماعیل کو تفصیلی بریفنگ دی۔

گورنر سندھ کو بریفنگ دیتے ہوئے کہا گیا کہ ‘بولتے حروف’ ایک بریل ترجمہ سافٹ ویئر ہے جس میں تمام متن کے مواد کو بریل میں ترجمہ کرنے کی صلاحیت ہے۔

بریفنگ دیتے ہوئے یہ بھی کہا گیا کہ بریل سافٹ ویئر کا مناسب استعمال آن لائن تعلیم کو ان لوگوں کے لیے قابل رسائی بنا سکتا ہے جو نابینا ہیں۔

بریفنگ دیتے ہوئے مزید کہا گیا کہ بریل سافٹ ویئر انہیں نقل و حمل میں حائل رکاوٹوں، سماجی ناانصافیوں اور کم تعلیمی مواقع سے بچا سکتا ہے، اس منصوبہ سے نابینا بچوں کو معاشرے کا حصہ محسوس کرنے میں مدد ملے گی کیونکہ ان کی سیکھنے میں رکاوٹیں بتدریج ختم ہو جاتی ہیں۔

ملاقات میں گورنر سندھ عمران اسماعیل نے وفد کی کوششوں کو سراہا اور اس سلسلے میں زیادہ سے زیادہ ممکنہ تعاون کی یقین دہانی کرائی۔

عمران اسماعیل نے کہا کہ تعلیم ہر شخص کا بنیادی حق ہے اور کسی جسمانی معذوری کی وجہ سے اس سے محروم کیا جانا ایک سنگین ناانصافی ہے۔

گورنر سندھ عمران اسماعیل نے مزید کہا کہ پاکستان میں تنظیمیں معذور افراد کی سماجی شمولیت کی محرومی کو ختم کرنے کے لیے جدید اور حوصلہ افزاء کاوشوں میں مصروف عمل ہیں۔

واضح رہے اس سے قبل گورنر سندھ عمران اسماعیل سے گورنر پنجاب چوہدری محمد سرور کی گورنر ہاﺅس کراچی میں ملاقات ہوئی تھی۔

ملاقات میں وفاقی حکومت کے صوبوں کے لئے ترقیاتی اقدامات سمیت اہمیت کے حامل اور دیگر امور پر تبادلہ خیال کیا گیا تھا۔

گورنر سندھ عمران اسماعیل نے کہا تھا کہ ملک کے معاشی و تجارتی حب کراچی کی تعمیر و ترقی کے لئیے وفاقی حکومت اقدامات یقینی بنا رہی ہے۔

عمران اسماعیل نے کہا تھا کہ موجودہ حکومت کے دور میں ہر شعبے میں ترقی ہوئی ہے، ترقیاتی منصوبوں کی تکمیل سے عام آدمی کا معیار زندگی بلند ہوگا۔

گورنر سندھ عمران اسماعیل نے مزید کہا تھا کہ ملک کی ترقی اور استحکام حکومت کی اولین ترجیح ہے۔