25 ہزار شائقین کے سامنے مسلم چمن فٹبال کلب نے روایتی حریف ہزارہ کمبائنڈ کو ہرا کر آل پاکستان چیف منسٹر بلوچستان فٹبال گولڈ کپ جیت لیا۔

تفصیلات کے مطابق ایوب فٹبال اسٹیڈیم کوئٹہ میں آل پاکستان نیشنل فٹبال گولڈ کپ کا فائنل میچ مسلم چمن فٹبال کلب اور ہزارہ کمبائنڈ کے مابین کھیلا گیا جسے دیکھنے کیلئے شائقین کا سمندر ایوب اسٹیڈیم امڈ آیا۔

 سنسنی خیز معرکے میں مسلم چمن کلب نے ہزارہ کمبائنڈ کو ایک صفر سے شکست دیکر ٹائٹل اپنے نام کیا۔

فاتح ٹیم کے کھلاڑیوں اور سیکرٹری کھیل میر عمران گچکی نے پاکستان فٹبال فیڈریشن کے بڑوں سے درخواست کی کہ اقتدار کی کھینچا تانی ترک کرکے فٹبالرز کے مستقبل اور کھیل کی بقاء کیلئے سوچا جائے کیونکہ کھیل میں سیاست آنے سے لاکھوں کھلاڑیوں کا نقصان ہو رہا ہے۔

ایونٹ میں مجموعی طور پر ملک بھر سے 5 ہزار کھلاڑیوں نے شرکت کی، ٹورنامنٹ کی فاتح ٹیم کو 15 لاکھ روپے دئیے گئے۔