قومی  کرکٹ ٹیم کے کپتان  بابر اعظم کا کہنا ہے کہ میگا ایونٹ میں کپتانی کرنا چیلنج ہے۔

تفصیلات کے مطابق کپتان پاکستان کرکٹ ٹیم بابر اعظم نے ورچوئل پریس کانفرنس کرتے ہوئے کہا کہ میں ورلڈ کپ پہلی مرتبہ کھیل رہا ہوں اور خوشی ہے کہ ایونٹ میں کپتانی کر رہا ہوں۔

بابر اعظم کا کہنا تھا کہ ہم اس بارے میں سوچ رہے ہیں کہ ہم ایونٹ میں اچھا کرنا ہے، اچھی پرفارمنس سے اعتماد ملتا ہے، میں فارم میں ہوں اس کا فائدہ ہو گا۔

ان کا کہنا ہے کہ ٹورنامنٹ سے قبل پرفارمنس اچھی ہو تو اس کا فائدہ ہوتا ہے جبکہ میں ایونٹ شروع ہونے کا منتظر ہوں ، مجھے یاد ہے جب پاکستان نے 2009 میں ٹی ٹوئنٹی ورلڈ کپ جیتا تھا وہ ہمارے لیے قابل فخر لمحہ تھا۔

بابر اعظم نے کہا کہ ہم اس مرتبہ پوری کوشش کریں گے کہ ایک بار پھر وہ لمحہ آئے ، متحدہ عرب امارات میں ہم نے بہت کرکٹ کھیلی ہے ، ہمیں کنڈیشنز کا اندازہ ہے۔

ان کا مزید کہنا تھا کہ کنڈیشنز کا ہمیں فائدہ رہ ہے لیکن ہمیں ہر شعبے میں اچھی کرکٹ کھیلنی ہے، شعیب ملک تجربہ کار کھلاڑی ہیں ان کا شمار فٹ کھلاڑیوں میں ہوتا ہے۔

انہوں نے کہا کہ بدقسمتی سے انٹرنیشنل سیریز نہ ہو سکیں ڈومیسٹک ٹورنامنٹ ہوا کچھ کھلاڑی اچھے ٹچ میں نہیں تھے جبکہ  کچھ کھلاڑیوں کی پرفارمنس اچھی نہ ہونے کےباعث تبدیلیاں کرنا پڑیں اور شعیب ملک ، فخرزمان اور حیدر علی ٹیم میں آئے۔