پاکستان مسلم لیگ(ن) کے سینئر رہنما حمزہ شہباز نے کہا ہے کہ آج قوم میاں صاحبان کی راہ تک رہی ہے۔

تفصیلات کے مطابق پاکستان مسلم لیگ (ن) کے سینئر رہنما حمزہ شہباز شریف نے ورکر کنوینشن سے خطاب کرتے ہوئے کہا کہ ملتان سے چلا ہوں راستے میں لوگوں نے جو پیار دیا ہے ایسا لگتا ہے میں اپنے گھر آیا ہوں۔

ان کا کہنا تھا کہ یہاں بیٹھے قائدین اور کارکنوں کو یاد دلانا چاہتا ہوں آپ انکے حامی ہیں جو نا جھکے نا کبھی بکے۔

حمزہ شہباز کا کہنا تھا کہ حاصل پور روڈ پہلی ایکسپریس روڈ ہے جس نے تحصیلوں کو ضلع سے ملایا یہ گھاٹے کا سودہ نہیں،ہم نے سڑکیں بنائی، بجلی کے منصوبے لگائے ملک کے اندھیرے ختم کیے۔

ان کا کہنا تھا کہ پی ٹی آئی کے  چار سال ہونے کو آئے غریب کا گھر لوٹا، ریاست مدینہ کی بات کرنے والے میرے نبی نے ایسا خواب نہیں دیکھا تھا، انھوں نے پیٹرول اکیس روپے پر لیٹر بڑھایا ہے، کتنے ہی لوگ ہیں جن کا کاروبار اس حکومت نے لوٹ لیا، کتنے ہی نوجوان ہیں جن کا مستقبل اس حکومت نے چکناچور کردیا۔

ان کا کہنا تھا کہ قوم کہتی ہے نیا پاکستان تو نا بن سکا خدا کا واسطہ پرانا پاکستان ہی لوٹا دو،انھوں نے پچھلے تین سالوں میں ایک اینٹ بھی نہیں لگائی بلکہ انتقامی کارروائی کی۔

حمزہ شہباز کا کہنا تھا کہ آج  بجلی کھاد یوریا مہنگی ہے، انھوں نے کسان کے پیٹ پر لات ماری ہے.

ان کا کہنا تھا کہ تین ہزار PHD ہولڈر بے روزگار ہیں،فارن فنڈنگ کیس جب کھلے گا تو عمران نیازی کسی کو منہ دکھانے کے قابل نہیں ہوگا۔

حمزہ شہباز کا کہنا تھا کہ 2023 کا الیکشن شیر کے نام ہوگا، ستلج دریا کے رہائشیوں کو بے گھر کردیا گیا، ہم انکو گھر واپس دینگے۔

ان کا کہنا تھا کہ سڑکوں کا لمبا جال جنوبی پنجاب کے حصے میں آیا،ہم نے جنوبی پنجاب سے جھوٹا وعدہ نہیں کیا۔

حمزہ شہباز کا کہنا تھا کہ مجھے پاکستان کے حالات دیکھ کر خوف آتا ہے،ایک اینٹ تک نہیں لگائی لیکن تین سالوں میں عربوں کا قرضہ لیا گیا،ہر روز ملک مقروض ہورہا ہے۔

حمزہ شہباز کا مزید کہنا تھا کہ وہ وقت دور نہیں  کہ جب دوبارہ سے ملک خوشحالی کی طرف جائے گا۔