ڈپٹی اسپیکر قومی اسمبلی قاسم خان سوری نے کہا ہے کہ پاکستان اور چین کے مابین دوستی دنیا کے لیے ایک مثال ہے۔

تفصیلات کے مطابق چین کے سفیر نوگ رونگ کی ڈپٹی اسپیکر قومی اسمبلی قاسم خان سوری سے ملاقات ہوئی جس میں دوطرفہ تعلقات، اہم علاقائی و عالمی معاملات اور باہمی دلچسپی کے دیگر امور پرتبادلہ خیال کیا گیا۔

ملاقات میں ڈپٹی اسپیکر قومی اسمبلی قاسم خان سوری نے چین کی  72 ویں سالگرہ پر چینی سفیر کو مبارکباد دی۔

ڈپٹی اسپیکر قومی اسمبلی کا کہنا تھا کہ پاکستان اور چین کے مابین دوستی دنیا کے لیے ایک مثال ہے، دونوں دوست ممالک میں تعلقات باہمی احترام ، اعتماد ، مفادات اور اسٹریٹجک شراکت داری پر استور ہیں۔

 قاسم خان سوری نے کہا کہ دونوں دوست ممالک کے بابین تعلقات ہر گزرتے دن کے ساتھ مضبوط سے مضبوط تر ہورہے ہیں۔

ڈپٹی اسپیکر قومی اسمبلی نے کہا کہ چین اور پاکستان علاقائی و عالمی معاملات پر یکساں موقف کے حامل ہیں۔ دونوں دوست ممالک نے علاقائی و عالمی فورمز پر ایک دوسرے کے موقف کی حمایت کی ہے۔

 قاسم خان سوری  کا کہنا تھا کہ بھارت نے مقبوضہ کشمیر میں تحریک حق خودارادیت کو دبانے کے لیے انسانی حقوق کی پامالیوں کا بازار گرم کر رکھا ہے۔ پاکستان مسئلہ کشمیر پر چین کے دوٹوک موقف پر چینی عوام اور حکومت کا مشکور ہے۔

ڈپٹی اسپیکر قومی اسمبلی نے کہا کہ چین پاکستان اقتصادی راہداری عظیم  منصوبہ دونوں دوست ممالک کے بہترین مفاد میں ہے۔

قاسم خان سوری نے اپنے بیا  ن میں یہ بھی کہا کہ سی پیک منصوبہ پورے خطے کی ترقی اور خوشحالی  کے منصوبے ہیں، پاکستان کی سیاسی قیادت سی پیک منصوبے کی مکمل حمایت کرتی ہے اور اس کے تحت قائم کیے جانے والے منصوبوں کی جلد تکمیل کی خواہاں ہے۔

اپنے بیان میں قاسم خان سوری کا کہنا تھا کہ دونوں ممالک کی پارلیمان کے مابین رابطوں کے فروغ سے دوطرفہ تعلقات کو نئی بلندیوں تک پہنچایا جا سکتا ہے، گوادر کی مقامی آبادی کو بنیادی سہولیات کی فراہمی گوادر پورٹ کے منصوبے سے بھرپور طور پر مستفید ہونے کے لئے ضروری ہے۔

  ڈپٹی اسپیکر قومی اسمبلی قاسم خان سوری نے مزید کہا کہ کوئٹہ بلوچستان کا سب سے بڑا شہر  اس شہر میں  چین کی طرف سے پاک۔ چین دوستی کی علامت کے طور پر ٹیکنیکل انسٹی ٹیوٹ  کا قیام خوش آئند ہو گا۔

ملاقات میں چین کے سفیر نوگ رونگ نے چین کے لیے ڈپٹی اسپیکر قومی اسمبلی قاسم خان کے جذبات کو سراہا۔

چین کے سفیر نے کہا کہ چین پاکستان کے ساتھ اپنی مثالی دوستی کو قدر کی نگاہ سے دیکھتا ہے، چین کی خارجہ پالیسی میں پاکستان کے ساتھ دوستی کو کلیدی اہمیت حاصل ہے۔

 نوگ رونگ کا کہنا تھا کہ چین اور پاکستان ایک دوسرے کے ہر دکھ سکھ کے دوست ہیں اور دونوں نے ہر مشکل وقت میں ایک دوسرے کا ساتھ دیا ہے۔

چین کے سفیر نے کہا کہ چین پاکستان کے ساتھ تجارتی حجم اور معاشی تعاون کو مزید وسعت دینے کا خواہاں ہے، اپنے تمام تر تجربات کو دونوں ممالک میں دوستی کے رشتے کو مزید مضبوط بنانے کے لیے بروے کار لاؤں گا۔

نوگ رونگ کا کہنا تھا کہ گوادر میں مقامی آبادی کو صاف پینے کے پانی سمیت دیگر سماجی بہبود  کے منصوبوں پر تیزی سے کام جاری ہے۔

 چین کے سفیر نوگ رونگ کا مزید کہنا تھا کہ گوادر پورٹ سی پیک منصوبے کا اہم حصہ ہے ، گوادر شہر کو ماڈل سٹی بنانے کے لیے پر عزم ہیں۔