پاکستان کرکٹ بورڈ (پی سی بی) کے چیئرمین رمیز راجہ نے کہا ہے کہ انٹرنیشنل کرکٹ کونسل میں بھارتی لابی مظبوط ہے۔

تفصیلات کے مطابق پاکستان کرکٹ بورڈ کے چیئرمین رمیز راجہ نے اپنے ایک بیان میں کہا کہ اگر انڈیا آئی سی سی کی فنڈنگ روک دے تو پاکستان کی کرکٹ ختم ہوجائے گی۔

ان کاکہنا تھاکہ نیوزی لینڈ اورانگلینڈ دورہ منسوخی پر آئی سی سی کو سخت خط لکھاانگلینڈ کے یہاں نہ آنے پر وزیر اعظم بورس جانسن کو جواب دینا پڑا جبکہ کیوی ٹیم واپس جانے پر دباؤ کا شکار ہے، دورہ ری شیڈول سے متعلق جلد اچھی خبر ملے گی۔

رمیز راجہ کا کہنا تھاکہ ویسٹ انڈیز اور آسٹریلیا کے دورے برقرار ہیں، اب آسٹریلیا پاکستان کا دورہ منسوخ کرنے سے پہلے سو بار سوچے گا۔

ان کا کہنا تھا کہ پاکستان ٹیم کو نمبر ون بنانا چاہتے ہیں، جب تک ٹیم نمبر ون نہیں بنے گی کسی کی کوئی کارکردگی نہیں۔

 سینیٹ کی قائمہ کمیٹی برائے بین الصوبائی امور کے اجلاس میں خطاب کرتے ہوئے پاکستان کر کٹ بورڈ کے چیئرمین رمیز راجہ نے کہا کہ چیئرمین شپ کی پوسٹ چیلنج سمجھ کر قبول کی تاہم اب ورلڈ کپ میں بہترین کارکردگی دکھائیں گے۔

رمیز راجہ کا کہنا  تھا کہ کرکٹ واحد کھیل ہے جس کی عالمی لیول پر اچھی ساکھ ہے تاہم کرکٹ بورڈ میں پیسہ صفر اور گالیاں زیادہ ہیں جب کہ ملک کی کرکٹ کو درست سمت میں لانے میں وقت درکار ہے۔

چیئرمین پی سی بی نے کہا کہ بتایا گیا کہ نیوزی لینڈ نے سیکیورٹی خدشات پر دورہ منسوخ کیا، سکیورٹی ایجنسیز نے خدشات پوچھے تو نیوزی لینڈ حکام نے نہیں بتایا جبکہ  برطانوی ہائی کمشنر نے بتایا کہ اتنے سنجیدہ سکیورٹی خطرات نہیں تھے۔

ان کا کہنا تھا کہ آئی سی سی سیکیورٹی حکام کے مطابق پاکستان میں سب سے بہترین اسپورٹس سکیورٹی ہوتی ہے لہٰذا اس معاملہ میں ہمارا کوئی قصور نہیں تھا۔

چیئرمین پی سی بی رمیز راجہ کا مزید کہنا تھاکہ ہم نے انگلینڈ کی کورونا کے دنوں میں دورہ کرکے مدد کی، بدقسمتی سے ہماری مدد کرنے کوئی نہیں آیا، اگر سیریز ری شیڈولنگ ہوئی تو نقصانات کم ہوجائیں گے ۔