پاکستان کرکٹ ٹیم کے باؤلنگ کوچ ورنن فلینڈر نے کہا ہے کہ ورلڈ کپ کا جیسا آغاز چاہتے تھے بلکل ویسا ہی ہوا ہے۔

تفصیلات کے مطابق پاکستان کرکٹ ٹیم کے باؤلنگ کوچ ورنن فلینڈر نے پریس کانفرنس کرتے ہوئے کہا کہ پاکستان نے پہلے میچ میں شاندار کارکردگی کا مظاہرہ کیا ، پاکستان ٹیم نے پہلے میچ میں تینوں شعبوں میں بہترین کھیل پیش کیا ہے۔

ان کا کہنا تھا کہ پہلے میچ کی طرح آئندہ میچز میں پرفارمنس کا سلسلہ جاری رکھنا چاہتے ہیں، ہم چاہتے ہیں آئندہ میچز میں جیت کا تسلسل برقرار رہے۔

ورنن فلینڈر کا کہنا تھا کہ حسن علی کو تھوڑے زیادہ رنز ضرور پڑے لیکن ان کی وکٹس نے جیت میں کردار ادا کیا  ہے۔

پاکستان کے باؤلنگ کوچ کا کہنا تھا کہ شاہین شاہ آفریدی دنیائے کرکٹ کا ابھرتا ہوا زبردست باؤلر ہے ، نئے بال کا شاہین آفریدی نے زبردست استعمال کیا ، شاہین آفریدی کا خاصا ہے وہ تیز باؤلنگ کرنے کے ساتھ ساتھ سوئنگ  بھی کرتے ہیں۔

پاکستان کرکٹ ٹیم کے باؤلنگ کوچ ورنن فلینڈر کا مزید کہنا تھا کہ انڈیا پاکستان پریشر گیم تھی، لیکن پاکستانی کھلاڑیوں نے اچھا پریشر ہینڈل کیا۔