روس میں رہنے والی ایک 28 سالہ انجیلیکا بارانووا نامی نرس نے 23 سال سے بال نہیں کٹوائے۔

سوشل میڈیا پر اس نرس کی لمبے بالوں کے ساتھ تصاویر وائرل ہوگئی ہیں جس کو دیکھ کر انہیں ’روسی روپینزل‘ کا لقب دے دیا گیا ہے۔

انجیلیکا بارانووا کے بارے میں بتایا جارہا ہے کہ جب وہ 5 برس کی تھیں تو اس کے بعد سے انہوں نے کبھی بھی اپنے بال نہیں کٹوائے۔

وائرل تصاویر میں ان کے بالوں کی لمبائی سر سے پیروں تک دیکھی جاسکتی ہے۔

انجیلیکا بارانووا کے بالوں کی اس لمبائی کو دیکھ کر انہیں مشہور افسانوی کردار ’ریپونزل‘ سے تشبیہ دیتے ہوئے انہیں روسی ریپونزل کہا جارہا ہے۔

رپورٹس کے مطابق نہ تو خود انجیلیکا اور نہ ہی ان کے والدین نے کبھی بالوں کو اتنی لمبائی دینے کا منصوبہ بنایا تھا بلکہ یہ سب کچھ وقت کے ساتھ ساتھ خود ہوگیا۔

انجیلیکا کا کہنا تھا کہ وہ اپنے بالوں کی زیادہ حفاظت نہیں کرتیں بلکہ وہ انہیں عام لوگوں کی طرح ہی شیمپو کرتی ہیں اور احتیاط کے ساتھ ان میں کنگھی کرتی ہیں۔

انہوں نے اس بات کا بھی اعتراف کیا کہ اتنے لمبے بالوں کے ساتھ چلنا کبھی کبھی نہ صرف چیلنجنگ بلکہ ناممکن بھی ہوسکتا ہے۔