وزیراعلیٰ سندھ مراد علی شاہ کی زیر صدارت سندھ کابینہ کا اجلاس آج صبح 10 بجے ہوگا۔

تفصیلات کے مطابق سندھ کابینہ کے اجلاس میں سندھ پولیس کے لیے گاڑیوں کی خریداری کا معاملہ زیر غور آئے گا اور سندھ ڈرگ رولز 1979 میں ترمیم، محکمہ صحت سندھ میں ہیلتھ منیجمنٹ کیڈر متعارف کروانے کا معاملہ بھی زیر غور آئے گا۔

ذرائع کے مطابق اجلاس میں سندھ صوبے کے سمندری ساحلوں پر سیاحت و واٹر اسپورٹس کے فروغ کے لیے اتھارٹی قائم کرنے پر غور ہوگا، سندھ ریونیو بورڈ ایکٹ 2010 میں ترمیم، پاک بحریہ کو 200 ایکڑ زمین دینے سے متعلق سب کمیٹی کی رپورٹ کابینہ اجلاس میں پیش ہوگی۔

اس کے علاوہ اجلاس میں سندھ انرجی ہولڈنگ کمپنی کے سی ای او کے تقرر کی منظوری دی جائے گی، سندھ حکومت کے سول سرونٹس کو اگلے گریڈ میں ترقی کے لیے ٹریننگ لازمی قرار دینے کا معاملہ بھی زیر غور ہوگا۔

واضح رہے کہ سندھ اربن پراپرٹی 1958 ٹیکس ایکٹ میں ترمیم کا معاملہ بھی سندھ کابینہ اجلاس کے ایجنڈے میں شامل ہے۔