وزیراعلیٰ پنجاب سردار عثمان بزدار نے کہا ہے کہ ترقیاتی منصوبوں کی بروقت تکمیل یقینی بنائی جائے۔

تفصیلات کے مطابق وزیراعلیٰ پنجاب سردار عثمان بزدار کی زیر صدارت پلاننگ اینڈ ڈویلپمنٹ بورڈ میں اعلیٰ سطح کا اجلاس ہوا جس میں سالانہ ترقیاتی پروگرام برائے سال 2021-22ء پر پیش رفت کا جائزہ لیا گیا۔

اجلاس میں چیئرمین منصوبہ بندی و ترقیات نے اے ڈی پی پر سہ ماہی پیشرفت کے بارے میں رپورٹ پیش کی۔

وزیر اعلیٰ پنجاب کو اجلاس میں  بریفنگ دیتے ہوئے کہا گیا کہ پلاننگ اینڈ ڈویلپمنٹ بورڈ سالانہ ترقیاتی پروگرام کے تحت 241 ارب روپے جاری کر چکا ہے ۔

  وزیراعلیٰ پنجاب سردار عثمان بزدار نے سالانہ ترقیاتی پروگرام کے تحت ڈویلپمنٹ پراجیکٹ پر کام کی رفتار مزید تیز کرنے کی ہدایت کی ۔

عثمان بزدار نے  کہاکہ  3 سال میں ساڑھے 15 ہزار سے زائد پراجیکٹ کی تکمیل خوش آئند ہے، رواں مالی سال میں 3975ترقیاتی منصوبے مکمل کئے جائیں گے۔

وزیراعلیٰ پنجاب کا کہنا تھا کہ  رواں مالی سال کے لئے 95 فیصد ترقیاتی منصوبوں کی منظو ری دی جا چکی ہے۔ترقیاتی منصوبوں کی بروقت تکمیل یقینی بنائی جائے۔

عثمان بزدار  نے کہا کہ کارکردگی کا مظاہرہ نہ کرنے والوں کو جوابدہی کا سامنا کرنا ہو گا جبکہ اچھی کارکردگی پر شاباش دیں گے اور سپورٹ کریں گے ۔

عثمان بزدار  کا کہنا تھا کہ تحریک انصاف کی حکومت نے پنجاب کی تاریخ میں پہلی بار جنوبی پنجاب کے لئے 35فیصد فنڈز مختص کئے ہیں ،560 ارب روپے کے تاریخی ترقیاتی پروگرام کے ثمرات ہر صورت عوام تک پہنچائے جائیں۔

وزیراعلیٰ پنجاب کا یہ بھی کہنا تھا کہ جنوبی پنجاب کے لئے مختص فنڈز کی رنگ فنسنگ کی گئی ہے  جبکہ جنوبی پنجاب کے لئے علیحدہ اے ڈی پی بک مرتب کی گئی ہے ۔

سردار عثمان بزدار  نے کہا کہ جاری شدہ فنڈز کا بروقت استعمال ہر صورت یقینی بنایا جائے  اور فلاح عامہ کے منصوبوں پر کام کی رفتار کو مزید تیز کیا جائے۔

وزیراعلیٰ پنجاب سردار عثمان بزدار  کا مزید کہنا تھا کہ سیکرٹریز باقاعدگی سے سالانہ ترقیاتی پروگرام کے تحت منصوبوں پر پیشرفت کا جائزہ لیں  اور متعلقہ افسران آن گراؤنڈ جا کر بھی سکیموں کو چیک کریں ۔ منصوبوں میں اعلیٰ معیار اور شفافیت پر کوئی سمجھوتہ نہیں ہو گا۔

اجلاس میں چیف سیکرٹری، انسپکٹر جنرل پولیس، معاون خصوصی برائے اطلاعات حسان خاور، سینئر ممبر بورڈ آف ریونیو،پرنسپل سیکرٹری وزیراعلیٰ اور تمام محکموں کے سیکرٹریز اور اعلی حکام نے  شرکت کی۔