پنجاب حکومت نے کورونا ویکسینیشن کا دائرہ کار بڑھانے کیلئے اہم اقدام اٹھاتے ہوئے صوبے بھر میں ویکسین لگانے کی سب سے بڑی مہم کا آغاز کردیا ہے۔

تفصیلات کے مطابق وزیراعلیٰ پنجاب سردار عثمان بزدار نے خانیوال پیپلز کالونی میں ویکسینیشن سنٹر کا دورہ کیا جہاں عثمان بزدار نے گھر گھر ویکسینیشن مہم کا افتتاح بھی کیا

وزیراعلیٰ پنجاب نے کہا کہ ریڈ کورونا مہم کے 100فیصد اہداف پورے کئے جائیں، کورونا کے باعث پہلے ہی جانی و مالی نقصان اٹھا چکے، مزید نقصان کے متحمل نہیں ہوسکتے۔

عثمان بزدار کا کہنا تھا کہ پنجاب میں شہریوں کو 12 نومبر تک ان کی دہلیز پر کورونا ویکسین لگائی جائے گی، خصوصی ٹیمیں روزانہ کی بنیاد پر گھر گھر جا کر شہریوں کو مفت ویکسین لگائیں گی۔

وزیراعلیٰ پنجاب نے کہا کہ 10لاکھ شہریوں کو ویکسین لگانے کا ہدف مقرر کیا گیا ہے، شہریوں سے اپیل ہے کہ کورونا ویکسین ٹیموں سے مکمل تعاون کریں۔

عثمان بزدار کا اپنے بیان میں کہنا تھا کہ پنجاب کو کورونا کے باعث بڑے پیمانے پر جانی و مالی نقصان کا سامنا کرنا پڑا ہے۔

انہوں نے کہا کہ پنجاب کی معیشت کو تقریباً 650ارب روپے کا نقصان اٹھانا پڑا ہے جبکہ پنجاب میں اب تک تقریباً 13 ہزار سے زائد افراد کورونا سے جاں بحق ہو چکے ہیں۔

عثمان بزدار نے کہا کہ جانی و مالی نقصان سے بچنے کیلئے ویکسینیشن اور احتیاط ضروری ہے جبکہ ریڈ ویکسینیشن مہم کو کامیاب بنانے کیلئے صوبہ بھرمیں 14ہزارنئے ویکسینیشن سنٹرزقائم کئے ہیں۔

وزیراعلیٰ پنجاب سردار عثمان بزدار کا مزید کہنا تھا کہ شہریوں کو ان کی دہلیز پر ویکسیشنیشن کیلئے 18ہزار ٹیمیں تشکیل دی گئی ہیں۔ ضلعی انتظامیہ اور ڈسٹرکٹ ہیلتھ اتھارٹیز اس مہم کو کامیاب بنانے کیلئے مشترکہ کاوشیں کریں گی۔