وزیراعلیٰ پنجاب سردار عثمان بزدار نے کہا ہے کہ شہریوں کے مسائل کم از کم ٹائم لائن کے ساتھ حل کئے جائیں۔

تفصیلات کے مطابق وزیراعلیٰ پنجاب سردار عثمان بزدار کی زیرصدارت اعلیٰ سطح کا اجلاس ہوا جس میں بورڈ آف ریونیو میں جاری اصلاحات پر پیش رفت کا جائزہ لیا گیا ۔

سینئر ممبر بورڈ آف ریونیو نے وزیراعلیٰ پنجاب  کو بریفنگ دیتے ہوئے کہا کہ پنجاب کی تاریخ میں پہلی بار 18 لاکھ خسرے ڈیجیٹلائزڈ کر دیئے گئے ہیں، آن لائن ریونیو کیس مینجمنٹ سسٹم کے تحت زیرالتوا کیسوں کی تعداد صرف 43 ہزار رہ گئی ہے۔

وزیراعلیٰ پنجاب کا کہناتھا کہ پنجاب بھر میں دیہی مرکز مال کی تعداد 1052 تک بڑھا دی گئی ہے، رواں مالی برس دیہی مرکز مال کی تعداد 8 ہزار تک بڑھا دی جائے گی۔

عثمان بزدار نے کہا کہ دیہی مرکز مال کی تعداد بڑھنے سے شہریوں کو ان کی دہلیز پر اراضی ریکارڈ تک آسان رسائی حاصل ہوگی۔

وزیراعلیٰ عثمان بزدار نے ریونیو سے متعلقہ زیر التواء کیسوں کو جلد از جلد نمٹانے کی ہدایت کرتے ہوئے کہا کہ نمبرداری سسٹم کو نئے تقاضوں سے ہم آہنگ کرتے ہوئے فعال کیا جائے گا۔

عثمان بزدار نے جلد نمبردار کنونشن کے انعقاد کی ہدایت کرتے ہوئے کہا کہ سٹیمپ پیپرز کا کاروبار کرنے والوں کیلئے سمارٹ کارڈ متعارف کرا دیئے گئے ہیں۔ ریونیو امور اور اراضی ریکارڈ کے حوالے سے عوام کیلئے مزید آسانیاں پیدا کی جائیں۔

وزیراعلیٰ پنجاب نے  بورڈ آف ریونیو کے عملے کی مانیٹرنگ کیلئے خصوصی یونٹ قائم کرنے کا حکم دیتے ہوئے کہا کہ مانیٹرنگ یونٹ اضلاع اور تحصیلوں میں جا کر عملے کی کارکردگی کا جائزہ لے گا۔

عثمان بزدار کا کہنا تھا کہ بعض اسسٹنٹ ڈائریکٹر لینڈ ریکارڈ کے آفس سے متعلقہ شکایات کا فوری ازالہ کیا جائے جبکہ شہریوں کے مسائل کم از کم ٹائم لائن کے ساتھ حل کئے جائیں۔

وزیراعلیٰ پنجاب سردار عثمان بزدار کا مزید کہنا  تھا کہ بلا جواز تاخیر کا سبب بننے والے افسروں اور اہلکاروں کے خلاف تادیبی کارروائی ہوگی۔

اجلاس میں ایڈیشنل چیف سیکرٹری، پرنسپل سیکرٹری وزیراعلیٰ، ڈی جی اینٹی کرپشن، بورڈ آف ریونیو کے ممبرز کالونیز، ٹیکس، کانسلڈیشن، ڈی جی پنجاب لینڈ ریکارڈ اتھارٹی، سپیشل مانیٹرنگ یونٹ کے سربراہ اور اعلیٰ حکام نے شرکت کی۔