صدر آزاد جموں وکشمیر بیرسٹر سلطان محمود چوہدری نے کہا ہے کہ ہماری حکومت کوٹلی کی عوام کے مسائل کے حل کے لئے ترجیحی بنیادوں پر کام کرائے گی۔

 تفصیلات کے مطابق صدر آزاد جموں وکشمیر بیرسٹر سلطان محمود چوہدری نے کوٹلی میں ایک  جلسے سے خطاب کرتے ہوئے کہا کہ میں نے جارحانہ انداز میں مسئلہ کشمیر کو سفارتی سطح پر اُٹھانا شروع کر دیا ہے اور ہم مقبوضہ کشمیر کے عوام کو یقین دلاتے ہیں کہ وہ اپنی جدوجہد میں تنہا نہیں بلکہ آزادکشمیر کا بچہ بچہ اُن کی اس جدوجہد میں اُن کے شانہ بشانہ کھڑا ہے۔

 صدر آزاد جموں وکشمیر نے کہا ہے کہ میں نے حکومت سے کہا ہے کہ آزادکشمیر میں جلد بلدیاتی انتخابات کرائے جائیں، اسی طرح احتساب کا عمل بھی جلد شروع کیا جائے تاکہ آزادکشمیر میں گڈ گورننس قائم ہو اور کرپشن سے پاک معاشرے کی تشکیل ممکن ہو سکے۔

 سلطان محمود چوہدری نے یہ بھی  کہا کہ ہمارا عوام سے وعدہ ہے کہ جہاں ہم احتساب بیورو کے ساتھ ساتھ عوامی احتساب بھی کریں گے جن کرپٹ لوگوں کے نام میرے سامنے آئیں گے میں عوام کے سامنے رکھوں گا۔

صدر آزاد جموں وکشمیر کا کہنا تھا کہ کوٹلی کے عوام نے ہمیشہ میرا ساتھ دیا ہے اور میں نے اپنے دور میں کوٹلی کے لئے ترقیاتی کام کیے تھے لہذا اب جبکہ ہماری اپنی حکومت ہے ہماری حکومت کوٹلی کی عوام کے مسائل کے حل کے لئے ترجیحی بنیادوں پر کام کرائے گی۔

 سلطان محمود چوہدری کا یہ بھی کہنا تھا کہ کوٹلی کے عوام نے ہمیشہ میرا ساتھ دیا ہے اور میں نے اپنے دور میں کوٹلی کے لئے ترقیاتی کام کیے تھے لہذا اب جبکہ ہماری اپنی حکومت ہے ہماری حکومت کوٹلی کی عوام کے مسائل کے حل کے لئے ترجیحی بنیادوں پر کام کرائے گی۔

صدر آزاد جموں وکشمیر  نے کہاکہ بھارت نے کشمیر پر غاصبانہ قبضہ کیا ہوا ہے اور بھارتی قابض افواج نے کشمیر میں انسانیت کے خلاف جرائم کی انتہا کر دی ہے۔

بیرسٹر سلطان محمود چوہدری  کا کہنا تھا کہ کشمیریوں سے اُن کی زمین چھینی جا رہی ہے انہیں اپنے گھروں سے بے دخل کیا جا رہا ہےجبکہ ہندوستانی قابض افواج بچوں، جوانوں اور بوڑھوں کوعقوبت خانوں میں ڈال رہی ہے جہاں پر اُن کو بدترین تشدد کا نشانہ بنایا جا رہا ہے۔

سلطان محمود چوہدری  نے کہا کہ بھارت کے ان مظالم کو بے نقاب اور مسئلہ کشمیر کو عالمی سطح پر اُجاگر کرنے کے لئے میں بین الاقوامی فورمز اور دنیا کے طاقتورایوانوں میں مظلوم کشمیری عوام کی آواز پہنچاؤں گا۔

صدر آزادکشمیر بیرسٹر سلطان محمود چوہدری  نے مزید کہا کہ ہماری حکومت آزادکشمیر میں گڈ گورننس اور لوگوں کا معیار زندگی بہتر بنانے کے لئے ہر ممکنہ اقدامات کرے گی۔