امریکی سائنسدانوں کے مطابق اگر روزمرہ کھانے میں مرچیں اور گرم مصالحے  شامل کر لیں تو اس سے بلڈ پریشر کم کرنے میں  مدد ملتی ہے۔

پنسلوانیا اسٹیٹ یونیورسٹی میں غذائیات کے پروفیسر پینی کرس ایتھرٹن اور ان کے ساتھیوں نے یہ تحقیق کی ،جس کے لئے ایسے 71 رضاکار بھرتی کیے جنہیں دل کی بیماری کا خطرہ تھا۔

ان تمام کو 16 ہفتوں تک روزمرہ کھانوں پر مختلف مقداروں میں مرچیں اور گرم مصالحہ جات چھڑک کر کھلائے گئے۔

ان رضاکاروں کو پہلے چار ہفتوں میں کھانے کے ساتھ کم مقدار میں مرچیں اور گرم مصالحے کھلائے گئے جس کے بعد دو ہفتے کا وقفہ دیا گیا۔

دوسرے مرحلے میں یہی عمل اوسط مقدار والی مرچوں اور گرم مصالحہ جات کے ساتھ دوہرایا گیا جس کے بعد ایک بار پھر دو ہفتے کا وقفہ رکھا گیا۔

آخری مرحلے میں مزید چار ہفتوں کے لئے مرچوں اور گرم مصالحوں کی مقدار سب سے زیادہ یعنی 6.5 گرام رکھی گئی، جو ڈیڑھ کھانے کے چمچے سے کچھ کم ہوتی ہے۔

ہر مرحلے کے بعد ان تمام رضاکاروں میں کولیسٹرول اور بلڈ پریشر کے علاوہ دل کی صحت کا جائزہ بھی لیا گیا۔

اختتام پر تجزیہ کیا گیا تو معلوم ہوا کہ کھانے کے ساتھ مرچوں اور گرم مصالحے کی 6.5 گرام مقدار روزانہ استعمال کرنے پر رضاکاروں میں بلڈ پریشر کم رہا اور کولیسٹرول کی سطح میں بھی اضافہ نہیں ہوا۔

اس کے علاوہ اگر سلاد اور پھل کھاتے وقت بھی ان پر مرچ اور گرم مصالحہ چھڑک لیا جائے تو یہ صحت کے لئے اور بھی مفید ہوگا۔