کراچی اور حیدر آباد کے تمام نادرا سینٹرز کے اوقات کار میں توسیع کر دی گئی ہے۔

تفصیلات کے مطابق کراچی اور حیدر آباد میں نادرا سینٹرز کے اوقات کار میں 2 گھنٹے بڑھادیئے گئے اور دونوں شہروں کے سینٹرز ہفتے میں 6 دن کھلے رہیں گے۔

چئیرمین نادرا طارق ملک کا کہنا ہے کہ کراچی اور حیدرآباد کے نادرا سینٹرز کے اوقات کار میں روزانہ 2گھنٹے کااضافہ کیا گیا ہے اور اوقات کار صبح 8بجے سے 6بجے تک کردیئے گئے ہیں۔

طارق ملک نے کہا کہ نادرا سینٹرز پر شہریوں کے رش کو مدنظر رکھتے ہوئے فیصلہ کیا، اسی تسلسل میں تمام نادرامراکز میں ہفتے میں 6 دن عوامی سہولیات کے لیے قومی شناختی کارڈز کی تجدید سمیت متفرق کام انجام دیے جائیں گے۔

چئیرمین نادرا طارق ملک  کا مزید کہناتھا کہ اوقات کار میں اضافے اورہفتے میں 6 روز دفاترفعال ہونے کے نتیجے میں عوام کو بہترسہولیات میسرآئے گی۔

یاد رہے گذشتہ ماہ چیئرمین نادرا طارق ملک نے کہا تھا کہ نادرا کی پالیسی میں بڑی تبدیلی کر دی گئی ہے شادی کے بعد عورت کی ‏مرضی ہے شوہر کا نام لکھوائے یا والدکا۔

چیئرمین نادرا کا کہنا تھا کہ 100 دنوں میں جینڈر گیپ 14 سے 10 فیصد پر آگیا ہے ‏عورتوں کی رجسٹریشن کیلئےخواتین پر مبنی اسپیشل ڈیپارٹمنٹ بنا دیاگیا ہے تمام خواتین کو کارڈ بنوانا چاہیے۔