صحت مند رہنے کے لئے کیلوریز کاؤنٹ یعنی کہ غذا میں موجود توانائی اور جسم کو مطلوب اس کی مقدار پر نظر رکھنا لازمی ہے۔

طبی و غذائی ماہرین کی جانب سے 100 سے کم کیلوریز والی 8 ایسی غذائیں روز مرہ روٹین میں استعمال کے لئے تجویز کی جاتی ہیں جو صحت کے لئے نہایت مفید بھی ہیں۔

طبی ماہرین کا کہنا ہے کہ وزن کم کرنے اور بڑھانے کے عمل میں سب سے اہم کردار کیلوریز کا ہوتا ہے۔

کیلوریز سے لبریز غذائیں موٹاپے سمیت متعدد بیماریوں کا بھی سبب بنتی ہیں جبکہ کم کیلوریز والی غذائیں زیادہ تر قدرتی اور صحت بخش ہوتی ہیں جن کا استعمال صحت اور لمبی زندگی کے حصول کے لئے نہایت ضروری ہے۔

سیب کے ایک کپ مقدار میں 62 کیلوریز پائی جاتی ہیں، سیب کیلوریز میں کم اور غذائیت سے بھر پور پھل ہے۔

سیب میں وٹامن سی، فائبر، پوٹاشیم اور اینٹی آکسیڈنٹ جیسی خصوصیات بھاری مقدار میں پائی جاتی ہیں۔

اس کے علاوہ اسٹرابیری کی ایک کپ مقدار میں 53 کیلوریز پائی جاتی ہیں، اسٹرابیری خون کی کمی کی شکایت بھی دور کرتی ہے ،اسٹرابیری میں ایک مخصوص پروٹین پائے جانے کے نتیجے میں اس کے استعمال سے تا دیر بھوک کا احساس نہیں ہوتا۔

شملہ مرچ کو عموماً سالن یا پھر سلاد بنا کر کھایا جاتا ہے، اس کے ایک کپ ( 92 گرام ) مقدار میں 24 کیلوریز پائی جاتی ہیں ، شملہ مرچ وٹامن سی اور اینٹی آکسیڈنٹ کمپاؤنڈ حاصل کرنے کا اہم ذریعہ ہے۔

بند گوبھی کے ایک کپ مقدار میں 22 کیلوریز پائی جاتی ہیں جبکہ یہ غذا صحت کے لئے نہایت مفید ثابت ہوتی ہے۔

ایک مکمل کھیرے میں 28 کیلوریز پائی جاتی ہیں، کھیرا کھانے سے پیٹ جلدی بھر جاتا ہے اور پانی کی کمی بھی دور ہوتی ہے۔

انڈے میں 72 کیلوریز، 6 گرام پروٹین اور بڑی مقدار میں وٹامنز اور منرلز پائے جاتے ہیں دیگر کم کیلوریز والی غذاؤں کی طرح انڈوں کا استعمال بھی بھوک کو کم کرتا ہے۔

بروکولی کے ایک کپ مقدار میں 54 کیلوریز پائی جاتی ہیں جبکہ انسانی جسم کو ایک دن میں درکار وٹامن سی کی مکمل مقدار پائی بھی جاتی ہے، بروکولی غذائیت سے بھرپور ہے جو کہ زیادہ تر بطور سلاد استعمال کی جاتی ہے۔

پالک کیلشیم اور آئرن سے بھر پورغذا ہے، اس کے استعمال سے خون کی کمی دور ہوتی ہے۔

 پالک کی ایک کپ مقدار میں صرف 7 کیلوریز پائی جاتی ہیں، پالک میں پروٹین کی بھاری مقدار کے باعث ماہر غذائیت اس کے استعمال کو تجویز کرتے ہیں۔