امیر جماعت اسلامی سراج الحق نے ”گوادر کو حق دو تحریک“ کے رہنما مولانا ہدایت الرحمن سے ٹیلی فونک رابطہ کیا، جس میں جماعت اسلامی بلوچستان کے سیکرٹری جنرل نے امیر جماعت کو تحریک سے متعلق آگاہ کیا۔

سراج الحق کا کہنا ہے کہ گوادر میں مقامی ماہی گیروں کا دھرنا 20ویں روز میں داخل ہوچکا ہے ، بلوچستان کی تاریخ کا پہلا واقعہ ہے کہ خواتین حقوق کے لیے باہر آئیں، عورتوں کاشیرخوار بچے اٹھا کر سڑک پر آنا معاملے کی سنجیدگی کو ظاہر کرتا ہے۔

یہ بھی پڑھیں: ‘گوادر میں مولانا ہدایت الرحمان نے اپنے مطالبات کیلئے دھرنا دیا ہوا ہے’

امیر جماعت اسلامی کا کہنا تھا کہ گوادر کے وسائل پر کچھ مافیاز نے قبضہ کر رکھا ہے، حکمران ہوش کے ناخن لیں اور مجبوروں کی آواز سنیں۔ حکمرانوں کا رویہ خود لوگوں کو تشدد کی طرف راغب کر رہا ہے۔

سراج الحق نے کہا کہ حکمران بتائیں علاقے کے غریب لوگ کدھر جائیں، عوام کی محرومیوں کا ازالہ نہ کیا گیا تو لاوا بری طرح پھٹے گا۔

ان کا کہنا تھا کہ چترال سے گوادر تک لوگ ”تبدیلی“ کے مضر اثرات سے متاثر ہیں۔ جماعت اسلامی بلوچستان کے عوام کے حقوق کی جدوجہد جاری رکھے گی۔