آرمی چیف جنرل قمر جاوید باجوہ سے امریکہ کی ہاوس فارن افیئرز کمیٹی کے چیئرمین گریگوری ویلڈن میکس کی قیادت میں نان پولفریشن، سینٹرل ایشیا اور ایشیا پیسفک کی سب کمیٹی کے چیئرمین امریش بابولعل نے وفد کے ہمراہ ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقاتوں میں باہمی دلچسپی کے امور، افغانستان کی موجودہ سیکیورٹی صورتحال اور مختلف شعبوں میں دوطرفہ تعاون پر تبادلہ خیال کیا گیا۔

آرمی چیف نے کہا کہ پاکستان تمام علاقائی کھلاڑیوں کے ساتھ دو طرفہ روابط کی روایت کو برقرار رکھنے اور خطے میں پائیدار امن کا خواہاں ہے۔

سربراہ پاک فوج نے انسانی بحران سے بچنے اور افغان عوام کی معاشی ترقی کے لیے مربوط کوششوں کے لیے افغانستان پر عالمی اتحاد کی ضرورت کا اعادہ کیا۔

انہوں نے ایک بار پھر زور دے کر کہا کہ “افغانستان میں امن کا مطلب پاکستان میں امن ہے”۔

دورے پر آئے معززین نے افغان صورتحال میں پاکستان کے کردار، موثر بارڈر مینجمنٹ کے لیے خصوصی کاوشوں، علاقائی استحکام میں کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔