وفاقی وزیر برائے توانائی حماد اظہر کا کہنا ہے کہ پیٹرول پمپس کی ہڑتال کی آڑ میں کچھ گروپس 9 روپے کا اضافہ کروانا چاہتے ہیں۔ چند کمپنیوں کو نوازنے کے لئے 9 روپے کا اضافہ نہیں کیا جا سکتا، صرف جائز مطالبات مانیں گے، ناجائز مطالبات تسلیم نہیں کریں گے۔

پیٹرولیم ایسوسی ایشن کی جانب سے ملک بھر میں ہڑتال پر ردعمل کا اظہار کرتے ہوئے وفاقی توانائی حماد اظہر کا کہنا تھا کہ پیٹرولیم ڈیلرز ایسوسی ایشن کے مطالبے پر مارجن میں اضافے کی سمری پہلے ہی ای سی سی میں پیش کر دی گئی ہے، آئندہ اجلاس میں اس کا فیصلہ ہو جائے گا، لیکن اس طرح عوام کو پریشان کرنا درست نہیں۔

حماد اظہر نے کہا کہ پیٹرول پمپ مالکان کی مشکلات کا بھی احساس ہے، مالکان عوام کی مشکلات کا احساس کرتے ہوئے اپنے فیصلے پر نظرثانی کریں۔

دوسری جانب ترجمان اوگرا کا کہنا ہے کہ تمام کمپنیوں کے ساتھ پیٹرول کی بلاتعطل سپلائی کے لئے رابطے میں ہیں، اوگرا تمام اسٹیک ہولڈرز کے ساتھ پیٹرولیم مصنوعات کی فراہمی کے لئے کوشاں ہے۔