مشیر تجارت نے غیر ضروری درآمدات روکنے کے لیے اہم فیصلہ کر لیا ہے۔

مشیر تجارت عبدالرزاق داؤد کی زیر صدارت وزارت تجارت میں اجلاس ہوا جس میں رواں مالی سال میں درآمدات، تجارت اور کرنٹ اکاؤنٹ خسارے پر ان کے اثرات پر غور کیا گیا۔

اجلاس میں مشیر تجارت کو بریفنگ دیتے ہوئے بتایا گیا کہ  وزارت تجارت  درآمدات پر گہری نظر رکھے ہوئے ہے، جولائی تا اکتوبر درآمدات 64 فیصد اضافے سے 24.99 ارب امریکی ڈالر تک پہنچ گئیں جبکہ گزشتہ مالی سال جولائی تا اکتوبر کے دوران 15.19 ارب امریکی ڈالر تھی۔

بریفنگ دیتے ہوئے کہا  گیا کہ  اس اضافے کا تقریباً 40 فیصد خام مال اور درمیانی اشیا میں ہے، خام مال کی درآمدات میں اضافہ اچھی بات ہے اور اس سے ملک میں صنعتی سرگرمیاں عروج پر آئی ہیں۔

بریفنگ دیتے ہوئے یہ بھی  کہا  گیا کہ  کیپٹل گڈز بشمول مشینری کی درآمد میں اضافہ صنعتی توسیع، اپ گریڈیشن اور نئی صنعتوں کے قیام کا اشارہ تھا، طویل مدت میں یہ درآمدات اقتصادی ترقی اور روزگار کے مواقع پیدا کرنے کے لیے بہت اہم ہیں۔

بریفنگ کے دوران بتایا گیا کہ بقیہ 60 فیصد درآمدات میں بنیادی طور پر توانائی  34 فیصد، ویکسینز 11 فیصد ہیں جبکہ خوراک کی درآمدات 8 فیصد، اشیائے خوردونوش 2 فیصد اور دیگر تمام 5 فیصد درآمدات شامل ہیں۔

بریفنگ دیتے ہوئے کہا  گیا کہ یہ درآمدات متعلقہ وزارتوں کے دائرہ کار میں تھیں اور ان میں سے زیادہ تر غیر لچکدار نوعیت کی ہیں۔

بریفنگ دیتے ہوئے مشیر تجارت کو  مزید بتایا گیا کہ اکتوبر 2021 میں پاکستان کے نان انرجی امپورٹ بل میں 12.5 فیصد کی کمی ہوئی ہے، نان انرجی امپورٹ بل میں ستمبر 2021 کے مقابلے میں 624 ملین امریکی ڈالر کی کمی ہے۔

اجلاس کی صدارت کرتے ہوئے مشیر تجارت عبدالرزاق داؤد نے غیر ضروری درآمدات روکنے کے لیے اسٹیٹ بینک کے ساتھ مل کر کام کرنے کی ہدایت دی۔

یاد رہے کہ تحریک انصاف کی حکومت نے ملک کی درآمدات میں کمی لانے کا اعلان کیا تھا تاکہ اس کے ذریعے تجارتی خسارے اور ملک کے جاری کھاتوں کے خسارے کو کم کیا جا سکے۔

گزشتہ مالی سال میں تحریک انصاف کی حکومت اس خسارے میں تھوڑی بہت کمی لانے میں کامیاب ہوئی تاہم موجودہ مالی سال کے آغاز سے درآمدات میں بہت زیادہ اضافہ دیکھنے میں آیا ہے جس سے تجارتی خسارہ بڑھنا شروع ہو گیا ہے۔

اگر ہم پاکستان کے درآمدی شعبے میں ملک میں آنے والی مصنوعات کا جائزہ لیں تو اس میں کھانے پینے کی چیزوں، تیل کی مصنوعات، گاڑیاں اور مشینری کی درآمدات میں بے تحاشا اضافہ دیکھا گیا ہے۔