بھارتی کرکٹ ٹیم کے کپتان ویرات کوہلی کی بیٹی کو ریپ کی دھمکیاں دینے والے ملزم کی ضمانت منظور ہوگئی۔

آئی سی سی ٹی ٹوئنٹی ورلڈکپ کے دوران پاکستان سے شکست کے بعد بھارتی ٹیم کے مسلمان کھلاڑی محمد شامی کی حمایت کرنے پر ویرات کوہلی اور اداکارہ انوشکا شرما کی 9 ماہ کی بیٹی کو سوشل میڈیا پر ریپ کی دھمکیاں دی گئی تھیں۔

بعد ازاں ’’دہلی کمیشن فار وومین‘‘، کی جانب سے پولیس کو ایک نوٹس بھیجا گیا جس میں مطالبہ کیا گیا کہ ویرات کوہلی کی معصوم بچی کو آن لائن ریپ کی دھمکیاں دینے والے شخص کے خلاف کارروائی کی جائے۔

جس پر ممبئی پولیس نے 10 نومبر کو کارروائی کرتے ہوئے 23 سالہ ملزم رمنا گیش کا سراغ لگاکر اسے حراست میں لیا اور اگلے ہی دن عدالت میں پیش کردیا۔ جہاں عدالت نے ملزم کو 16 نومبر تک پولیس کسٹڈی میں دے دیا۔

دوسری جانب ملزم کے وکیل کی جانب سے عدالت میں ضمانت کی درخواست دائر کی گئی جس میں کہا گیا ’’ ویرات کی بیٹی کو دھمکیاں میں نے ہی دیں، پولیس کے پاس اس بات کا کوئی واضح ثبوت نہیں ہے‘‘۔

درخواست گزار نے مزید کہا کہ ایسا ممکن ہے کہ میری آئی پی کسی نے ہیک کرکے یہ پیغام سوشل میڈیا پر ڈالا ہو‘‘، لہذا تفتیش مکمل ہونے تک مجھے ضمانت پر رہا کیا جائے۔

واضح رہے بھارتی انتہاپسند ہندوؤں نے ورلڈکپ میں پاکستان سے شکست کا الزام محمد شامی پرعائد کرتے ہوئے اسے غدار قرار دے دیا تھا جس پر ویرات کوہلی سمیت متعدد کھلاڑی محمد شامی کی حمایت میں سامنے آگئے تھے۔