پاکستان کرکٹ ٹیم کے وائس کپتان شاداب خان نے کہا ہے کہ رات کے وقت دبئی میں اسپنرز کے مقابلے میں فاسٹ باؤلرز کو زیادہ مدد مل رہی ہے۔

تفصیلات کےمطابق قومی کرکٹ ٹیم کے وائس کپتان اور آل راؤنڈر شاداب خان نے میڈیا سے گفتگو کرتے ہوئے کہا کہ ابو ظہبی اور شارجہ میں فاسٹ بولرز کو کھیلنے میں مشکل آ رہی ہے۔

ان کاکہنا تھا کہ ٹیم میں کافی ایسے کھلاڑی ہیں جو پانچ چھ سال سے ایک ساتھ کھیل رہے ہیں، بہت سے کھلاڑی ایک دوسرے کی نیچر اور گیم کو جانتے ہیں۔

شاداب خان کا کہنا تھا کہ جب پاکستان کا اسٹار اور کلر پہنتے ہیں تو اس کا پریشر ہوتا ہے، ہر میچ میں پریشر ہوتا ہے اسکاٹ لینڈ کے خلاف میچ میں بھی ہوگا۔

ان کا کہنا تھا کہ گروپ میچ ہو یا سیمی فائنل سب کا الگ پریشر ہوتا ہے۔

وائس کپتان کا کہنا تھا کہ کوشش ہوگی جیسی کرکٹ ٹورنامنٹ میں کھیلتے آ رہے ہیں ویسی ہی فارم اسکاٹ لینڈ کے خلاف میچ میں جاری رکھیں۔

قومی کرکٹ ٹیم کے وائس کپتان شاداب خان کا مزید کہنا تھا کہ آئی سی سی ٹورنامنٹ میں سب ٹیمیں ہی ٹف ہوتی ہیں۔