نارتھ کیرولینا سے لاپتہ ہونے والی 16 سالہ لڑکی کو ٹک ٹاک کی مدد سے بازیاب کروالیا گیا۔

کینٹکی پولیس انتظامیہ نے نارتھ کیرولینا سے لاپتہ ہونے والی ایک ایسی لڑکی کو بازیاب کروالیا جس نے ٹک ٹاک پر مدد کا ایک اشارہ سیکھا اور اس سے مدد مانگی۔

یہ لڑکی گزشتہ منگل کو اپنے گھر سے لاپتہ تھی اور جمعرات کو ایک کارسوار نے نائن ون ون سروس پر فون کر کے اس کی خبردی جس کے بعد لڑکی کو بازیاب کروالیا گیا۔

اس شخص نے فون پر بتایا کہ شاہراہ پر آگے دوڑنے والی ایک گاڑی میں ایک نوعمر لڑکی ہے جس نے ٹک ٹاک پر عام ہونے والا ایک اشارہ کیا جس کے تحت گھریلو تشدد میں دوسروں کی مدد مانگی جاتی ہے۔

اس اشارے کا مطلب یہ ہوتا ہے کہ گھریلوتشدد سے مجھے بچانے میں مدد کرو۔

اس اشارے میں کھلا ہاتھ دیکھنے والے شخص کے سامنے کیا جاتا ہے اور انگوٹھا موڑ کر اسے ہتھیلی سے لگانے کے بعد باقی چار انگلیاں بند کی جاتی ہیں، اس طرح انگوٹھے پر انگلیاں آجاتی ہے۔

پولیس کے مطابق لڑکی نے یہ اشارہ ٹک ٹاک پر سیکھا تھا جسے پیچھے آنے والے شخص نے دیکھ  کر سمجھ لیا اور پولیس کو رابطہ کیا، مشتبہ شخص لڑکی کو نارتھ کیرولینا سے اوہایو لے جارہا تھا، پولیس نے اس مجرم کو گرفتار کرلیا ہے۔