پاکستان تحریک انصاف کے راہنما عثمان ڈار کا کہنا ہے کہ مریم نواز بہترین آلا راؤنڈر کھلاڑی ہیں، ٹیپ ٹیپ کھیلتے یہ خود ٹیپ میں پھنس گئے ہیں ، جس سازشی جال کو انہوں نے سابق چیف جسٹس کے لئے بُنا اس میں خود پھنس گئے ہیں۔

سیالکوٹ جناح اسٹیڈیم میں تعمیراتی کام کا جائزہ لینے کے موقع پر پاکستان تحریک انصاف کے راہنما عثمان ڈار نے میڈیا سے گفتگو کرتے ہوئے کہا ہے کہ پاکستان کا سب سے بڑا ٹیلنٹ ہنٹ سپورٹس کا پروگرام شروع کرنے جا رہے ہیں، جس کے پہلے فیز میں پچیس ریجنز میں مختلف کھیل کی بارہ کیٹیگریز رکھی گئیں ہیں۔ پاکستان میں نئے ٹیلنٹ کے لئے سنہری مواقع فراہم کریں گے ۔

انہوں نے کہا کہ 81 کروڑ کی لاگت سے اسٹیڈیم کا تعمیری کام جاری ہے جبکہ 24 کروڑ کی لاگت سے ہاکی اسٹیڈیم اور فٹبال گراؤنڈ اپ گریڈ کیا جائے گا۔

 عثمان ڈار نے کہا پہلے مرحلے میں پی ایس ایل کے میچز کے انعقاد کی کوشش کریں گے۔

عثمان ڈار کا کہنا تھا کہ مریم نواز بہترین  آل راؤنڈر کھلاڑی ہیں، مریم نواز کی آڈیو بھی لیک ہوئی ہے جسے انہوں نے تسلیم کیا ہے ٹیپ ٹیپ کھیلتے یہ خود ٹیپ میں پھنس گئے ہیں، انہوں نے سابق چیف جسٹس ثاقب نثار کے لئے جال بُنا تھا جس میں خود پھنس گئے ہیں۔

عثمان ڈار کا کہنا تھا کہ انہوں نے میڈیا ہاؤسسز کے فنڈ اس لئے روکے کہ وہ ان کے ایجنڈے پر کام نہیں کر رہے تھے۔