ملک میں گزشتہ روز کورونا سے متاثرہ افراد کی تعداد صحتیاب ہونے والوں سے زیادہ ریکارڈ کی گئی ہے۔

سرکاری اعداد و شمار کے مطابق گزشتہ روز ملک بھر میں کورونا کی تشخیص کے لئے 37 ہزار 148 ٹیسٹ کئے گئے۔ جن میں سے 322 میں کورونا کی تشخیص ہوئی، اس طرح کورونا مثبت کیسز کی شرح 0.86 فیصد رہی۔

ملک میں اب تک 12 لاکھ 82 ہزار 195 افراد میں کورونا کی تشخیص ہوچکی ہے، گزشتہ روز مزید 236 افراد نے اس وبا کو شکست دی ہے۔ اس طرح اب تک کورونا کے 12 لاکھ 30 ہزار 970 مصدقہ مریض صحتیاب ہوچکے ہیں۔

ملک میں گزشتہ روز کورونا کی وبا نے مزید 3 افراد کی جان لے لی ہے، اس طرح اب تک ملک میں کورونا سے جاں بحق افراد کی تعداد 28 ہزار 663 ہوگئی ہے۔

این سی او سی کے مطابق اس وقت ملک بھر میں کورونا کے 22 ہزار 562 فعال مریض ہیں، جو اپنے گھروں، اسپتالوں اور قرنطینہ مراکز میں زیر علاج ہیں، ان مریضوں میں سے ایک ہزار 43 کی حالت تشویشناک ہے۔

واضح رہے کہ یورپ کے کئی ملکوں میں کورونا کی شدت میں ایک مرتبہ پھر اضافہ دیکھا جارہا ہے، جرمنی میں گزشتہ ایک ہفتے سے یومیہ 45 ہزار سے زائد افراد کورونا کا شکار ہورہے ہیں۔