حافظ نعیم الرحمن نےکہا ہے کہ بلدیاتی ترمیمی بل آئین سے متصادم ہے۔

امیر جماعت اسلامی کراچی حافظ نعیم الرحمن نے متنازع بلدیاتی ترمیمی بل پر وزیر اعلیٰ سندھ کو قانونی نوٹس بھجوا دیا۔

اپنے بیان میں حافظ نعیم الرحمن  نے کہا کہ بلدیاتی اداروں کے اختیارات مزید کم کرنے کے لیے سندھ حکومت کی جانب سے بلدیاتی ترمیمی بل 2021کی منظوری پر صوبے کے چیف ایگزیکٹو،وزیراعلیٰ سندھ کو قانونی نوٹس بھجوادیا ہے۔

امیر جماعت اسلامی کراچی کا کہنا تھا کہ بلدیاتی قانون کو آئین سے ہم آہنگ کرنے کے لئے سات دن کا وقت دے دیا، موجودہ بل آئین سے متصادم ہے۔

 حافظ نعیم الرحمن نے کہا کہ نوٹس میں متنازع شقوں کوتبدیل کرنے کا مطالبہ کیا ہے اور کہا ہے کہ آئین سے متصادم کسی قانون سازی کی کوئی حیثیت نہیں ہے۔

انہوں نے کہا کہ پیپلزپارٹی کی حکومت نے 2012 اور 2013میں شہری حکومت کے اختیارات میں کمی کی جبکہ پیپلزپارٹی کی حکومت نے 2012 اور 2013میں لوکل گورنمنٹ کے تحت چلنے والے بہت سے اداروں کو  بھی اپنے ماتحت کرلیا۔

امیر جماعت اسلامی کراچی حافظ نعیم الرحمن  کا مزید کہنا تھا کہ شہری حکومت کو بااختیارکیا جائے  اور اگر سات دن میں نوٹس کے مطابق کاروائی نہ ہوئی تو اعلی عدلیہ کے روبرو قانونی چارہ جوئی کی جائے گی۔