پاکستان نے بھارتی وزیر دفاع راج ناتھ سنگھ کے دھمکی آمیز بیان کو اشتعال انگیز اور غیر ذمہ دارانہ قرار دیتے ہوئے مسترد کردیا۔

ترجمان دفتر خارجہ عاصم افتخار احمد کا کہنا ہے کہ بھارتی وزیر دفاع کا بیان فریب انگیز ہے، اس بیان سے بھارت کی اپنے ہمسائیوں سے دشمنی کی فطرت کی عکاسی ہوتی ہے۔

عاصم افتخار احمد نے کہا کہ بھارت کی پاکستان مخالف مہم مکمل طور پر بے نقاب ہو چکی ہے، بھارت کی پاکستان مخالف مہم کو بین الاقوامی برادری میں پذیرائی حاصل نہیں ہوئی۔

ترجمان دفتر خارجہ نے کہا کہ بھارتی قیادت ہمسائیوں بالخصوص پاکستان پر الزام تراشیوں میں غلط بیانی اور تصورات سے کام لیتی ہے۔ اس طرح بھارت عالمی برادری کی توجہ مقبوضہ کشمیر میں جاری وسیع انسانی حقوق و انسانی قوانین کی خلاف ورزیوں سے ہٹانا چاہتا ہے۔

خیال رہے کہ بھارتی وزیر دفاع راج ناتھ سنگھ نے گزشتہ روز بھارتی ریاست اتراکھنڈ کے پتھورا گڑھ میں شہید سمان یاترا سے خطاب میں کہا تھا کہ پاکستان بھارت میں امن کو غیر مستحکم کرنے کی تمام کوششیں کرتا ہے، لیکن ہم نے انہیں واضح پیغام دیا ہے کہ ہم جوابی وار کریں گے۔ یہ ایک نیا اور طاقتور ہندوستان ہے۔