قاسم خان سوری کا کہنا ہے کہ دنیا بھر میں کمپنیاں لوگوں کا ڈیٹا جمع کر رہی ہیں۔

ڈپٹی اسپیکر قومی اسمبلی قاسم خان سوری نے راولپنڈی میں ایرڈ ایگریکلچر یونیورسٹی میں طلباء و طالبات سے خطاب کرتے ہوئے کہا کہ آرٹیفیشل انٹیلیجنس پر بات ہورہی ہے، اقوام عالم کا انحصار چیزوں کو سمجھنے میں ہے۔

انہوں نے کہا کہ گزشتہ چند سالوں میں تیزی سے تبدیلیاں آئیں، اگر نہیں اپنائیں گے تو آگے نہیں جاسکتے، اسمارٹ، فون، واٹس ایپ سے چیزیں سمت گئی ہیں۔

قاسم خان سوری نے کہا کہ وہی قوم آگے جائے گی جو وقت پر چیزیں اپنائے گی، 90 لاکھ پاکستانی دنیا بھر میں محنت کر رہے ہیں، دنیا بھر میں کمپنیاں لوگوں کا ڈیٹا جمع کر رہی ہیں۔

ڈپٹی اسپیکر کا کہنا ہے کہ ایف بی آر میں ریفارمز کے بغیر آگے نہیں جاسکتے، کورونا کے سامنے دنیا کے طاقتور ملک بےبس ہوگئے ہیں، ہم نے لوگوں کی مدد کی اور 12 ہزار روپے دیئے۔

انہوں نے کہا کہ یہ سب کام نوجوانوں کی بنائی اپلیکیشن سے کیا اور یہ سب کرنے کے لیے آرٹیفیشل انٹیلیجنس استعمال کی۔

قاسم خان سوری نے کہا کہ لاکھوں لوگ انکم اسپورٹ پروگرام سے فائدہ لے رہے تھے، آرٹیفیشل انٹیلیجنس کے ذریعے ان کے نام نکلوائے گئے۔

ڈپٹی اسپیکر نے مزید کہا کہ دنیا میں 8 ٹریلین ڈالر کا ٹرانزیکشن موبائل کے ذریعے ہوتے ہیں، مسلم امہ میں نوجوانوں کی سب سے بڑی تعداد پاکستان میں ہے۔