وفاقی کابینہ نے سعودی عرب کی جانب سے 3 ارب ڈالر کے ذخائر اسٹیٹ بنک میں رکھنے کے معاہدے کی منظوری دے دی۔

تفصیلات کے مطابق وفاقی کابینہ نے سرکولیشن سمری کے ذریعے معاہدے کی منظوری دی۔ وزیراعظم عمران خان کے دورہ سعودی عرب کے دوران سعودی حکومت نے 3 ارب ڈالر اسٹیٹ بینک کے ذخائر میں رکھنے کا وعدہ کیا تھا۔

ذرائع کا کہنا ہے کہ معاہدے کے متن کے مطابق سعودی عرب کے 3 ارب ڈالراسٹیٹ بینک میں ایک سال کے لیے جمع رہیں گے۔ پاکستان اس رقم پرسعودی حکومت کو سالانہ 4 فیصد منافع ادا کرے گا۔

سعودی حکومت کے ساتھ معاہدے کا ڈرافٹ وزارتِ قانون اور اٹارنی جنرل آفس کو بھجوایا گیا جس پر وزارت قانون اور اٹارنی جنرل آفس نے معاہدے کے ڈرافٹ پر اتفاق کیا۔

قانونی رائے کے بعد معاہدے کی کاپی وفاقی کابینہ کو منظوری کے لیے بھجوائی گئی تھی۔ کابینہ نے سعودی ڈویلپمنٹ فنڈ سے ملنے والے 3 ارب ڈالراسٹیٹ بینک کے ذخائر میں رکھنے کی منظوری دی۔