قطر میں دو ناروجین صحافیوں کی گرفتاری پر ناروے کے سیاسی اور کھیلوں سے تعلق رکھنے والے رہنماؤں نے برہمی کا اظہار کیا ہے۔

غیر ملکی خبر رساں ادارے دی گلوب پوسٹ کی رپورٹ کے مطابق ناروے کے دونوں صحافی ورلڈ کپ 2022 کی تیاریوں کے حوالے سے قطر میں رپورٹنگ کررہے تھے۔

گرفتار صحافی، ہالور ایکلینڈ اور لوک مین گھوربانی، ‘این آر کے’ نامی نشریاتی ادارے کے لیے کام کرتے ہیں، جنہیں وطن واپسی سے کچھ دیر قبل گرفتار کیا گیا تھا۔

واضح رہے کہ صحافیوں کی گرفتاری ان کی جانب سے مبینہ طور پر ایونٹ کے انعقاد سے ایک سال قبل، 21 نومبر 2022، کے حوالے سے متنازع خبریں چلانے پر کی گئی تھی۔

انہیں قطری حکام نے بغیر کسی الزامات کے گرفتاری کے 30 گھنٹے کے بعد رہا کردیا تھا اور وہ اب اوسلو منتقل ہوچکے ہیں۔

ناروجین وزیراعظم جوناس کا کہنا تھا کہ قطر میں ناروجین صحافیوں کی گرفتاری ناقابل قبول ہے۔

انہوں نے سماجی روابط کی ویب سائٹ ٹوئٹر پر ایک جاری بیان میں کہا کہ جمہوریت کو چلانے کے لیے آزاد پریس انتہائی اہم ہے۔

ان کا کہنا تھا کہ میں بہت خوش ہوں کہ دونوں صحافیوں کو رہا کردیا گیا ہے۔

دوسری جانب قطری حکام نے تصدیق کی کہ دو صحافیوں کو نجی املاک پر سے گزرنے کی وجہ سے گرفتار کیا گیا تھا۔

قطر کی حکومت کے ترجمان نے ایک جاری بیان میں کہا کہ غیر ملکی صحافیوں کو قطر میں فلم بندی کی اجازت دی گئی اور انہیں ملک میں داخل ہوتے ہی متعدد سہولیات بھی فراہم کی گئی تھیں جبکہ حکومت کے سینئرز اور دیگر سے بھی ان کی ملاقات کی اجازت دی گئی تھی۔

انہوں نے مزید کہا کہ ان تمام سہولیات کے باوجود غیر ملکی صحافیوں ںے جان بوجھ کر عام قوانین کی خلاف ورزی کی۔

خیال رہے کہ ناروے ان ممالک میں شامل ہے، جس نے 2022 کے فٹ بال ورلڈ کپ کی میزبانی قطر کو دینے پر تنقید کی تھی اور قطر میں لیبر ویلفیئر کو بہتر کرنے کے لیے دباؤ ڈالا تھا۔

یہ بھی یاد رہے کہ لیبر کے حقوق کے لیے کام کرنے والے گروپس نے قطر میں ورلڈ کپ سے متعلق تعمیر ہونے والے میگا پروجیکٹ پر لیبر کو کم تنخواہیں دینے، خطرناک صورت حال میں کام کے دوران سزا اور محدود آزادی جیسے الزامات عائد کیے ہیں۔