پاکستان کرکٹ بورڈ (پی سی بی) سینٹرل پنجاب انٹر کلب چیمپئن شپ میچ کے دوران کھلاڑی وقاص خالد حرکت قلب بند ہو جانے  کےباعث انتقال  کرگئے ہیں۔

جلو کرکٹ گراؤنڈ لاہور میں پی سی بی کلب ٹورنامنٹ میچ کے دوران افسوسناک واقعہ پیش آیا، سنٹرل پنجاب انٹر کلب چیمپئین شپ کا میچ مغل پورہ وائٹس اور باغبانپورہ ایگلٹس کے درمیان کھیلا جا رہا تھا۔

انٹرکلب چیمپئین شپ کے دوران مغل پورہ وائٹس کے کرکٹر وقاص خالد کی اچانک طبعیت خراب ہو گئی ، وقاص خالد کو ابتدائی طبی امداد دی گئی لیکن جانبر نہ ہو سکے۔

  واقعے کے بعد امپائرز نے فوری طور پر میچ روک دیا، وقاص خالد کی وفات پر لاہور کے کرکٹ حلقوں میں افسردگی چھا گئی ہے۔

یاد رہے گزشتہ روز کراچی میں بھی کرکٹر رضوان میچ  کے دوران جاں بحق ہوگئے تھے۔

بانٹوا کلب اور کمبائنڈ کلب کے درمیان نمائشی میچ داؤ میڈیکل کالج کے گراؤنڈ میں کھیلا جارہا تھا،  میچ کے دوران کمبائنڈ الیون کے کھلاڑی رضوان نے سینے میں درد کی شکایت کی، رضوان کو فوری طور پر ڈاؤ میڈیکل کالج کے اسپتال پے جایا گیا،  طبی امداد کے دوران رضوان جاں بحق ہوگیا تھا۔