معروف گیم  پب جی نے صارفین کے لئے نیا فیچر متعارف کروادیا ،کمپنی نے دنیا کے 200 ممالک میں پب جی کو نئے اور جدید انداز سے پیش کردیا۔

چین کی ٹیکنالوجی کمپنی ٹینسنٹ کی زیر ملکیت گیم ملٹی پلیئر آن لائن بیٹل گراؤنڈز (پب جی) کے صارفین کی تعداد ایک ارب سے تجاوز کرچکی ہے۔

پب جی کے ایگزیکٹیو پروڈیوسر منکو پارک نے تعارفی تقریب میں خطاب کرتے بتایا کہ ہم دنیا بھر میں موجود صارفین کی خواہشات کو مدنظر رکھتے ہوئے گیم میں تبدیلیاں کررہے ہیں۔

انہوں نے بتایا کہ پب جی میں مزید 17 زبانوں کو شامل کیا گیا ہے جن میں انگریزی، چینی، اردو، ہندی، عربی سمیت دیگر شامل ہیں۔

منکو پارک کا کہنا تھا کہ اب زمینی لڑائی کا اگلا مرحلہ محسوس ہوگا جس کا تجربہ گیمرز کے لئے انتہائی شاندار ہوگا۔

ایگزیکٹیو پروڈیوسر نے بتایا کہ کرافٹن دراصل اُن کھلاڑیوں کے اعتماد کو مزید بڑھائے گا جو کئی عرصے سے ہمارے ساتھ جڑے ہوئے ہیں۔

اس گیم میں دو ٹیموں کا آپس میں مقابلہ ہوتا ہے، ایک کھلاڑی سے لے کر 100 کھلاڑیوں تک کی ٹیم ہوتی ہے جو انٹرنیٹ کے ذریعے ایک دوسرے سے جڑتی ہے۔

دونوں ٹیموں کے کھلاڑی جہاز سے زمین پر اتر کر پہلے اسلحہ تلاش کرتے ہیں اور پھر سامنے والے کھلاڑی کو فائرنگ کر کے مارتے ہیں، آخر میں زندہ رہنے والے فاتح کھلاڑی کو اعزاز میں چکن ڈنر دیا جاتا ہے۔

واضح رہے کہ پب جی گیم کو سب سے زیادہ ڈاؤن لوڈ ہونے کی وجہ سے دنیا کا کامیاب ترین گیم ہونے کا اعزاز بھی حاصل ہوگیا۔