پاکستان آئل ٹینکرز ایسوسی ایشن نے پیٹرولئیم ڈیلرز ایسوسی ایشن کی جانب سے اعلان کردہ ہڑتال سے مکمل لاتعلقی کا اعلان کردیا۔

صدر آئل ٹینکرز ایسوسی ایشن میر شمس شہوانی کا کہنا ہے کہ آئل ٹینکرز کی لاتعلقی سے 80 فیصد پیٹرول پمپ کھلیں رہینگے، جبکہ 26  ہزار آئل ٹینکرز ملک بھر میں سپلائی جاری رکھیں گے۔

یہ بھی پڑھیں: ہڑتال کے دوران پیٹرول کہاں کہاں دستیاب ہوگا؟

دوسری جانب وزارت پٹرولیم کے ترجمان کا کہنا ہے کہ کل ملک بھر میں تمام پی ایس او، شیل، ٹوٹل اور دیگر کمپنیوں کے اپنے پیٹرول پمپ کھلے رہیں گے۔

ترجمان وزارت پیٹرولیم نے کہا کہ آئل سپلائی میں مستعدی کے لئے ٹینکروں کو روانہ کردیا گیا ہے۔

وزارت توانائی کے پٹرولیم ڈویژن کی جانب سے پیٹرول پمپ ڈیلرز کے مارجن بڑھانے کے لئے کیس ای سی سی بھیجوا دیا گیا۔

ترجمان وزارت پیٹرولیم کا کہنا ہے کہ آئل مارکیٹنگ کمپنیز اور ڈیلرز کے مارجن میں مناسب اضافے کے لئے وزارت کوشاں ہے، اس حوالے سے وفاقی کابینہ کے زریعے دس روز میں فیصلے کا امکان ہے۔

ترجمان کا مزید کہنا تھا کہ آئل سیکٹر کی مختلف تنظیموں نےوزارت کی جانب سے اٹھائے گئے اقدامات پر اطمینان کا اظہار کیا ہے۔

انہوں نے کہا کہ عوام کو کوئی فکر کرنے یا پریشان ہونے کی ضرورت نہیں۔