مراد راس نے کہا ہے کہ ہم سرکاری اسکولوں کے تعلیمی معیار کو نجی اسکولوں سے بہتر بنانا چاہتے ہیں۔

صوبائی وزیر تعلیم پنجاب مراد راس نے بطور مہمان خصوصی نور سینٹر برائے ریسرچ اینڈ پالیسی کی جانب سے منعقدہ تقریب میں شرکت کی، تقریب کا انعقاد فاطمہ میموریل ہسپتال لاہور کے آڈیٹوریم میں کیا گیا۔

ان  کا  کہنا تھا کہ نور فاؤنڈیشن کی جانب سے لاہور کے سرکاری ا سکولوں میں ‘سفرِ حفاظت’ پروگرام کا انعقاد کئے جانا بہت خوش آئند تھا، لاہور کے سرکاری اسکولوں میں ‘سفرِ حفاظت’ پروگرام کا انعقاد اپریل 2019 سے مئی 2021 کے دوران کیا گیا۔

 مراد راس نے کہا کہ سفرِ حفاظت’ پروگرام کے تحت بچوں کو زندگی گزارنے کے مختلف پہلوؤں کے حوالے آگاہ کیا گیا ، بچوں کو تعلیم کے ساتھ ساتھ ان کی حفاظت اور ان کی بہتر پرورش کے لئے تربیت دئیے جانا بھی قلیدی اہمیت کا حامل ہے۔

صوبائی وزیر تعلیم پنجاب نے کہا کہ بچوں کو پڑھائی کے ساتھ ساتھ سماجی زندگی کی تعلیمات دینے کے لئے اساتذہ کا کردار سب سے اہم ہوتا ہے ۔

مراد راس کا کہنا تھا کہ ماضی کی حکومتوں کی جانب سے پبلک سکولوں کے تعلیمی نظام کو دانستہ طور پر تباہ کیا گیا، ہم سرکاری اسکولوں کے تعلیمی معیار کو نجی اسکولوں سے بہتر بنانا چاہتے ہیں۔

صوبائی وزیر تعلیم پنجاب مراد راس کا مزید کہنا تھا  کہ طلبا کے لئے اساتذہ کا کردار انتہائی اہم ہوتا ہے،ایک بچہ اپنے والدین سے زیادہ وقت اپنے اساتذہ کے ساتھ گزارتا ہے، آج جو کام ہم محکمہ تعلیم پنجاب میں کر رہے ہیں اس کا اثر آنے والے چند سالوں میں واضح طور پر نظر آئے گا۔