آسٹریلیا میں منعقد ہونے والی ایشز سیریز کے پانچویں ٹیسٹ کی میزبانی ہوبارٹ کو ملنے کا امکان ہو گیا۔

انگلینڈ اور آسٹریلیا کے مابین روایتی سیریز کا پانچواں ٹیسٹ کورونا وائرس کے نئے ویرئینٹ اومیکرون کے باعث ملتوی کرنے کا اعلان کیا گیا تھا۔ کرکٹ آسٹریلیا نے پرتھ کی انتظامیہ کی جانب سے پیشگی حفاظتی اقدامات کی وجہ ٹیسٹ میچ ملتوی کرنے کی درخواست منظور کر لی تھی، خدشہ تھا کہ شاید سیریز کا پانچواں ٹیسٹ کورونا کے باعث کھیلا ہی نہیں جائے گا۔

کرکٹ آسٹریلیا نے پرتھ ٹیسٹ کے ملتوی ہونے کے بعد نئے وینیو کی تلاش کا کام شروع کر دیا تھا، اب آسٹریلوی میڈیا کے مطابق اس ٹیسٹ میچ کی میزبانی کے لئے ٹینڈر دینے کا فیصلہ کیا ہے۔

اس حوالے سے کرکٹ آسٹریلیا نے میچ کی میزبانی کرنے والے ممکنہ اسٹیڈیم کی انتظامیہ کو گائڈ لائن بھی جاری کر دی ہے، جس کے تحت میزبان اسٹیڈیم کی انتظامیہ کورونا سے بچاؤ کے تمام تر اقدامات بروئے کار لائے گا، اور کھلاڑیوں سمیت تمام میچ اسٹاف بشمول براڈکاسٹنگ عملے کو سیکیور بائیو ببل کی سہولیات دی جائیں۔

ہوبارٹ کرکٹ اسٹیڈیم کی انتظامیہ نے اس میچ کے حوالے سے اپنی دلچسپی ظاہر کی ہے اور وہ روایتی ایشز سیریز کا ٹیسٹ میچ اپنے گراؤنڈ پر کرانے کے لئے کافی پرجوش ہیں۔

واضح رہے کہ ہوبارٹ کرکٹ اسٹیڈیم کو افغانستان اور آسٹریلیا کے مابین ہونے والے سیریز کے واحد ٹیسٹ میچ کی میزبانی حاصل تھی مگر کورونا وائرس کے نئے ویرئینٹ اومیکرون کے خدشے کے یہ میچ باعث ملتوی کر دیا گیا تھا..