نارووال: مسلم لیگ (ن) کے رہنماء احسن اقبال نے ورکرز کنونشن سے خطاب میں کہا کہ پچھلے الیکشن کمپین میں پی ٹی آئی نے ہمارے خلاف مذہب کارڈ استعمال کیا، سازش کے تحت ختم نبوت کے مسئلے کو ہماری حکومت کے خلاف کھڑا کیا گیا۔

ن لیگی رہنما احسن اقبال نے کہا کہ میں نے کہا تھا یہ تحریک “ ختم نبوت” نہیں ہے یہ تحریک “ختم حکومت” ہے. وہ جو روش شروع کی گئی اس کا انجام سیالکوٹ میں کیا نکلا ہے۔

نارووال میں اپنے خطاب میں احسن اقبال نے کہا کہ پاکستان میں دہشت گردی، لوڈشیڈنگ کو ن لیگ نے ختم کیا، آج ہمیں اس ملک کے اندر لوگوں کو جوڑنا ہے، 2018 میں دھاندلی کے ساتھ ن لیگ کی حکومت کو ختم کیا گیا، دھاندلی سازش تھی سی پیک کے منصوبے کو ختم کرنے کی۔

احسن اقبال نے مزید کہا کہ آج سوا تین سال ہو گئے ہیں کہتا ہے میں این آر او نہیں دوں گا، تم سے این آر او کوئی نہیں مانگ رہا، تم سے غریب آدمی سستی بجلی روزگار ، جینے کا حق مانگ رہا ہے، عوام کی کوئی فکر نہیں ہے، مہنگائی جہاں مرضی چلی جائے  کہتا ہے کہ میں این آر او نہیں  دوں گا۔

ان کا مزید کہنا تھا کہ مجھ پر جھوٹا کیس بنایا کہ نارووال میں سپورٹس سٹی سٹیڈیم کے منصوبے کیوں بنائے، عمران خان کے انتقام میں سزائے موت کی چکی میں رکھا گیا، عدالت کے سامنے کوئی ثبوت نہ رکھ سکے عدالت نے ہمیں عزت کے ساتھ ضمانت دی۔

انہوں نے کہا کہ جو ہم کام کر گئے تھے اس میں ایک اینٹ کا اضافہ نہیں کر سکے ہیں، اس نالائق حکومت کو ہم پر مسلط کر دیا گیا ہے، اپنی کوئی کارگردگی نہیں مسلم لیگ کے منصوبوں پر تختیاں لگا رہا ہے، دوسروں پر تنقید کرتا ہے آج تک فارن فنڈنگ کیس کا حساب نہیں دیا، الیکشن کمیشن میں پی ٹی آئی نے درجنوں اکاونٹ چوری کئے اس کا حساب نہیں  دیا، بیرون ملک سے جو تحفے ملے لوگ پوچھ رہے ہیں ان کا حساب دو کہتا ہے میں نے حساب نہیں دینا، دوسروں  سے رسیدیں مانگتا ہے آج اپنے تحفوں کی رسیدیں دینے کو تیار نہیں، اگلے الیکشن میں ان کا حال ق لیگ جیسا ہوگا جیسے 2008 میں اُن کا ہوا تھا۔