بھارت میں اومیکرون کے کیسز میں تیزی سے اضافہ ہورہا ہے اور یہ تعداد 200 سے تجاوز کرگئی ہے۔

بھارتی میڈیا کے مطابق ملک کی مختلف ریاستوں میں کورونا وائرس کے نئے ویرینٹ ’اومیکرون‘ کے کیسز میں تیزی سے اضافہ ہوتا جارہا ہے اور آئے دن نئی ریاستوں سے کیسز رپورٹ ہورہے ہیں۔

بھارتی وزارت صحت کی جانب سے جاری ہونے والے بیان میں کہا گیا ہے کہ اب تک بھارت کی 12 ریاستوں میں کورونا وائرس کے نئے ویرینٹ ’اومیکرون‘ کے کیسز رپورٹ ہوئے ہیں اور یہ تعداد سب سے زیادہ مہاراشٹرا سے سامنے آئی ہے۔

وزارت صحت کے مطابق اومیکرون کے 77 مریض صحتیاب ہوگئے ہیں۔ اس حوالے سے سب سے زیادہ کیسز ریاست مہاراشٹرا سے رپورٹ ہوئے جن کی تعداد 54 ہے جس کے بعد ریاست تلنگانہ کا نمبر ہے جس میں متاثرین کی تعداد 20 ہے جب کہ کرناٹکا میں 19، راجھستان 18، کیرلا 15 اور گجرات میں 14 کیسز رپورٹ ہوئے ہیں۔

یہ بھی پڑھیں: بھارت میں اومی کرون کے کیسز میں تیزی سے اضافہ

وزارت صحت نے بتایا کہ بھارت میں گزشتہ 24 گھنٹوں کے دوران 5 ہزار 326 کیسز رپورٹ ہوئے ہیں جو گزشتہ 581 دنوں میں سب سے کم تعداد ہے جب کہ ملک بھر میں اب تک کورونا سے متاثر ہونے والوں کی تعداد 3.48 کروڑ ہے جن میں اب صرف 79 ہزار 97 ایکٹو کیسز باقی رہ گئے ہیں۔

وزارت صحت نے مزید کہا کہ گزشتہ 24 گھنٹوں کے دوران کورونا کے 453 مریض ہلاک ہوئے جس سے کورونا سے ہلاک ہونے والوں کی مجموعی تعداد 4.78 لاکھ ہوگئی ہے۔