چیئرمین نیب نے کہا ہے کہ نیب ملک سے کرپشن کے خاتمے کیلے سنجیدہ کاوشیں کررہا ہے۔

چیئرمین نیب جسٹس (ر) جاوید اقبال کی زیر صدارت اعلیٰ سطحی اجلاس منعقد ہوا جس میں نیب کی مجموعی کارکردگی کا جائزہ لیا گیا۔

اجلاس کی صدارت کرتے ہوئے جاوید اقبال نے کہا کہ نیب وائٹ کالرکرائم اور میگا بدعنوانی کے مقدمات کو اولین ترجیح دے رہی ہے۔

انہوں نے کہا کہ ملک اور قوم کے اربوں روپے لوٹنے والوں کوقانون کے کٹہرے میں لانے کیلے تمام وسائل بروے کار لاۓ جارہے ہیں۔

چیئرمین نیب کا کہنا تھا کہ بدعنوانی کا خاتمہ آج پوری قوم کی آواز ہے، نیب ملک سے کرپشن کے خاتمے کیلے سنجیدہ کاوشیں کررہا ہے۔

جاوید اقبال نے کہا کہ کرپشن ملکی ترقی کی راہ میں نہ صرف بڑی رکاوٹ ہے بلکہ مستحق لوگوں کو ان کے حق سے بھی محروم کرتی ہے ۔

ان کا کہنا تھا کہ گزشتہ 4 سالوں کے دوران 539ارب روپے برآمد کئے  جو  ماضی میں کبھی برآمد نہیں کئے گئے، احتساب عدالتوں میں 1335ارب روپے مالیت کی بدعنوانی کے 1278مقدمات زیر سماعت ہیں۔

چیئرمین نیب جسٹس (ر) جاوید اقبال کا مزید کہنا تھا کہ نیب کرپشن اور بدعنوانی کے میگاکیسز کو قانون کے مطابق منطقی انجام تک پہنچانے کے لئے پرعزم ہے۔