کراچی میں اومیکرون کا دوسرا کیس سامنے آگیا تاہم متاثرہ شخص ہوٹل سے فرار ہونے میں کامیاب ہوگیا۔ 

ذرائع کے مطابق 35 سالہ شخص برطانیہ سے کراچی پہنچا، رینڈم چیکنگ میں متعلقہ شخص میں پہلے کورونا اور بعد میں اومیکرون کی تصدیق ہوئی، ایئرپورٹ سے محکمہ صحت کے عملے نے شاہراہ فیصل پر واقع نجی ہوٹل میں منتقل کیا، جینوم سیکویسنگ کے بعد اومیکرون کی تصدیق ہوئی۔

ذرائع کے مطابق متعلقہ شخص ہوٹل کے قرنطینہ سے فرار ہوگیا، قرنطینہ پر سیکیورٹی فراہم کرنا محمکہ داخلہ پولیس اور متعلقہ ڈی سی کی ذمہ داری ہے۔

نجی ہوٹل میں اب بھی 19 افراد قرنطینہ میں ہیں ،سیکیورٹی اب بھی فراہم نہیں کی گئی ، 19 میں سے 5 کی سیکویسنگ ابھی ہونی ہے،سیکیورٹی کی عدم فراہمی کے باعث اب تک 38 افراد قرنطینہ سے بھاگ چکے ہیں۔

واضح رہےکہ حکومت پاکستان نے کیٹیگری سی اور امی کرون والے ممالک پر سفری پابندی لگائی ہے، برطانیہ کیٹیگری سی میں نہیں آتا۔