جوائنٹ ٹاسک ٹیم نے ملتان میں مقامی پولیس، ایلیٹ فورس اور حساس اداروں کے ہمراہ سرچ آپریشن کیا ہے۔

تفصیلات کے مطابق سرچ آپریشن انچارج جے ٹی ٹی خرم خان کی سربراہی میں کیا گیا، سرچ آپریشن تھانہ لوہاری گیٹ، پرانی کوتوالی، چہلیک اور سیتل ماڑی کے علاقے دربار شاہ شمس میں کیا گیا۔

پولیس ترجمان کا کہنا تھا کہ دربار بہاء الدین زکریا، سرکلر روڈ، گھنٹہ گھر، دربار شاہ رکن عالم، چاہ برکت والا، گودڑی، وہاڑی چوک، لاری اڈہ میں بھی سرچ آپریشن کیا گیا۔

پولیس ترجمان نے بتایا کہ سرچ آپریشن کے دوران 3 مشکوک افراد کو گرفتار کر کے پولیس تھانہ پرانی کوتوالی کے حوالے کردیا گیا، سرچ آپریشن کے دوران 22 ہوٹل، سرائے اور 96 گھروں کو چیک کیا گیا۔

پولیس ترجمان کے مطابق سرچ آپریشن کے دوران 87 افراد کی بائیو میٹرک تصدیق کی گئی۔