سردیوں کی چھٹیاں کب سے ہونگی؟ وزیر تعلیم سندھ نے اس حوالے سے اہم بیان جاری کر دیا۔

صوبائی وزیر تعلیم سردارشاہ سندھ کا کہنا ہےکہ اسکولوں اور کالجوں میں موسم سرما کی تعطیلات کا فیصلہ جمعرات تک کر لیا جائے گا۔

وزیر تعلیم سردار شاہ  نے کہاکہ موسم سرما کی تعطیلات کے حوالے سے فیصلہ ورکنگ کمیٹی کے اجلاس میں کیا جائے گا۔

ان کا مزید کہنا تھا کہ موسم سرما کی چھٹیاں ضرور ہونگی، طلباء کو بریک بھی چاہئیے۔

انہوں نے صحافی کے سوال پر جواب دیتے ہوئے کہا ہے کہ ممکنہ طور پر چھٹیوں کی تاریخیں وہی ہوں گی جو ہمیشہ ہوتی ہیں۔

صوبائی وزیر تعلیم نے کہاکہ خبریں آ رہی ہیں کہ کورونا وائرس کی نئی لہر بہت خطرناک ہے، دنیا بند ہو رہی ہے۔ دعا ہے کہ ہمارے بچے اس ویرینٹ سے محفوظ رہیں۔

واضح رہےکہ فرانس میں کورونا کی وبا کے پیش نظر 4 ہفتوں کے لیے نئی پابندیاں لگادی گئی ہیں۔

فرانس میں کورونا کی وبا نے ایک مرتبہ پھر سر اٹھا لیا، اسپتالوں میں مریضوں کے لئے جگہ کم پڑنے کے بعد ایمرجنسی نافذ کر دی گئی ۔

اس صورت حال کے پیش نظر فرانسیسی وزیراعظم جین کاسٹیکس نے کابینہ اجلاس کے بعد اپنے ٹیلی وژن خطاب میں 4 ہفتوں کے لئے نئی پابندیوں کا اعلان کردیا ہے۔

نئی پابندیوں کے تحت ملک کے تمام نائٹ کلب 4 ہفتوں کے لیے بند کردیئے گئے ہیں تاہم ریسٹورنٹس پر گنجائش کی کوئی پابندی نہیں ہوگی۔

 یورپ کے کئی ملک اس وقت کورونا کی لپیٹ میں ہیں، کورونا کی اومی کرون قسم منظرعام پر آنے کے بعد کئی ملکوں نے نئی سفری پابندیاں لگادی ہیں۔