امیر جماعت اسلامی سراج الحق نے کہا ہے کہ اسلامی ممالک فلاحی سرگرمیوں میں افغان حکومت کی فوری مدد کریں۔

صدر ہلال احمر افغانستان مولوی مطیع الحق خالص نے چار رکنی وفد کے ہمراہ امیر جماعت اسلامی سراج الحق سے ملاقات کی ۔

اس موقع پر سراج الحق کا کہنا تھا کہ افغانستان میں لاکھوں افراد خوراک کی شدید کمی کا شکار ہیں، بروقت امدادنہ پہنچی تو برف باری سے کئی علاقوں تک رسائی نا ممکن ہوجائے گی۔

امیر جماعت اسلامی سراج الحق کا کہنا تھا کہ اسلامی ممالک فلاحی سرگرمیوں میں افغان حکومت کی فوری مدد کریں، اسلامی ممالک بالخصوص پاکستان فوری طور پر افغانستان کی حکومت کو تسلیم کرے۔

ملاقات میں صدر ہلال احمر افغانستان مولوی مطیع الحق خالص نے کہا کہ جماعت اسلامی نے طالبان حکومت کے قیام کے بعد امداد پہنچائی، افغان حکومت اور عوام جماعت اسلامی کے شکرگزار ہیں۔

مولوی مطیع الحق خالص نے الخدمت فاؤنڈیشن پاکستان کے ہیڈ آفس کا بھی دورہ کیا۔