وزیراعلیٰ خیبر پختونخوا محمود خان نے کہا ہے کہ شہدائے اے پی ایس کا غم آج بھی ہمارے دلوں میں زندہ ہے اور ہمیشہ زندہ رہے گا۔

محمود خان نے سانحہ اے پی ایس کی ساتویں برسی کے موقع پر پیغام دیتے ہوئے کہا کہ آرمی پبلک اسکول پشاور کا سانحہ ملکی تاریخ کا ایک اندوہناک واقعہ ہے، اے پی ایس کے طلباء اور اساتذہ کی شہادت ہمیشہ یاد رکھی جائے گی۔

انکا کہنا ہے کہ آرمی پبلک اسکول کے معصوم بچوں نے اپنی جانوں کا نذرانہ دے کر ملک میں دیرپا امن کی بنیاد رکھی، ان معصوموں کی شہادت نے پوری قوم ، حکومت اور اداروں کو مشترکہ دشمن کے خلاف متحد کر دیا۔

وزیراعلیٰ خیبر پختونخوا نے کہا کہ شہدائے اے پی ایس کا غم آج بھی ہمارے دلوں میں زندہ ہے اور ہمیشہ زندہ رہے گا، اس المناک اور دردناک  واقعے نے دہشت گردی کے ناسور کے خلاف قوم اور اداروں کو یکجا کردیا۔

انہوں نے کہا کہ دہشت گردی کے جنگ میں قوم کے دیگر سپوتوں کی طرح ہمارے نونہالوں نے بھی جام شہادت نوش کرکے تاریخ رقم کی، قوم ان نونہالوں کی عظیم قربانیوں کو کبھی فراموش نہیں کرسکتی۔

وزیراعلیٰ محمود خان نے مزید کہا کہ پوری قوم  شہدائے اے پی ایس کے خاندانوں کے عزم اور حوصلوں کو سلام پیش کرتی ہے۔