وزیر اطلاعات سندھ سعید غنی نے کہا ہے کہ یومِ ثقافت کے دن آپس کے اختلافات کسی صورت مناسب نہیں۔

سعید غنی نے حکومتِ سندھ کا یوم ثقافت کے موقعے پر تمام ٹی وی چینلز اور دیگر دوستوں کو مبارکباد دی، اس موقع پر ان کا کہنا تھا کہ آج تمام ٹی وی چینلز اور دوستوں کو ثقافت کا دن منانے میں مکمل سہولیات فراہم کی ہیں، آج کے دن آپس کے اختلافات اور گروپ بندی کسی صورت مناسب نہیں۔

ان کا کہنا تھا کہ کچھ گروپس ایک دوسرے کے ساتھ اختلافات کی وجہ سے دین محمد وفائی روڈ بلاک رکھنا چاہتے ہیں، تمام چینلز کو آپس کے اختلافات بھلا کر سندھ کی ثقافت سے محبت کے اظہار کے پروگرام  جاری رکھنے چاہیے۔

انہوں نے کہا کہ حلیم عادل شیخ جیسے لوگوں کا وطیرہ ہے کہ جہاں دھواں نکلتا ہے وہاں پیٹرول چھڑکتے ہیں، ثقافت والے دن بھی ثقافت پر سیاست کرنا افسوس کی بات ہے، چند گروپس کے آپس کے اختلافات میں  سندھ حکومت کو مورد الزام نہ ٹھہرایا جائے۔

وزیر اطلاعات سندھ سعید غنی کا مزید کہنا تھا کہ ہم نے تمام نیوز چینلز اور گروپس کو سہولیات اور سیکورٹی فراہم کی ہے، امید ہے کہ آج کے دن کوئی غیر مناسب بات نہیں ہوگی۔

واضح رہے کہ وادی سندھ کی صدیوں پرانی تہذیب کو فروغ دینے کے لیے آج سندھ کا ثقافتی دن روایتی جوش و جذبے کے ساتھ منایا جا رہا ہے، اس دن کو منانے کے لیے صوبے بھر میں سرکاری اور غیر سرکاری سطح پر مختلف پروگرام منعقد کیے گئے ہیں۔

عوام کی جانب سے ثقافتی دن پر مختلف مقامات سے ریلیوں کا بھی انعقاد کیا گیا ہے، لوگ سندھ ٹوپی اور اجرک پہن کر سندھ ثقافتی میوزک پر جھوم رہے ہیں اور بچوں کی موج مستیاں بھی جاری ہیں۔

خیال رہے کہ ثقافتی تقریبات میں تقاریر، اسٹیج ڈراماز اور سندھی فنکار اپنے فن کا مظاہرہ کر رہے ہیں۔