سینیٹر اینگس کنگ کی سربراہی میں امریکی سینیٹ کی آرمڈ سروسز اور انٹیلی جنس کمیٹیوں کے اراکین نے آرمی چیف جنرل قمر جاوید باجوہ سے ملاقات کی۔ جس میں باہمی دلچسپی کے امور، افغانستان کی موجودہ سیکیورٹی صورتحال اور مختلف شعبوں میں دوطرفہ تعاون پر تبادلہ خیال کیا گیا۔

امریکی وفد سے ملاقات میں آرمی چیف جنرل قمر جاوید باجوہ نے کہا کہ پاکستان تمام علاقائی کھلاڑیوں کے ساتھ نتیجہ خیز دو طرفہ روابط برقرار رکھنے اور پرامن، متنوع، پائیدار تعلقات کا خواہاں ہے۔

سربراہ پاک فوج نے انسانی بحران سے بچنے اور افغان عوام کی معاشی ترقی کے لیے مربوط کوششوں کی ضرورت کے لیے افغانستان پر عالمی اتحاد کی فوری ضرورت کا اعادہ کیا۔

چیف آف آرمی اسٹاف نے آنے والے چیلنجوں کے پیش نظر جیو پولیٹیکل اور سیکیورٹی صورتحال کے بارے میں باہمی افہام و تفہیم کے لیے سینیٹرز کی کوششوں پر شکریہ ادا کیا۔

دورہ کرنے والے معززین نے افغان صورتحال میں پاکستان کے کردار، بارڈر مینجمنٹ کے لیے خصوصی کاوشوں، علاقائی استحکام میں کردار کو سراہا اور پاکستان کے ساتھ ہر سطح پر سفارتی تعاون کو آگے بڑھانے کے لیے اپنا کردار ادا کرنے کا عہد کیا۔

امریکی وفد میں سینیٹر رچرڈ بر، سینیٹر جان کارن اور سینیٹر بین ساس بھی شامل تھے۔ پاکستان میں امریکی ناظم الامور انجیلا ایگلر بھی وفد کے ہمراہ موجود تھیں۔