مقبوضہ جموں و کشمیر کے مختلف علاقوں میں پوسٹر چسپاں کئے گئے ہیں جن میں لوگوں سے اپیل کی گئی ہے کہ وہ  قابض بھارتی فورسز کے ہاتھوں کشمیری مسلمانوں کی نسل کشی کے خلاف یکم جنوری 2022 کو مکمل ہڑتال کریں۔

کشمیر میڈیاسروس کے مطابق سرینگر اور مقبوضہ کشمیرکے دیگر علاقوں میں دیواروں اور بجلی کے کھمبوں پر پوسٹرز چسپاں کیے گئے ہیں۔

پوسٹروں میں لوگوں سے اپیل کی گئی ہے کہ وہ دنیا اور بھارتی حکومت کو یہ واضح پیغام دینے کے لیے ہڑتال کریں کہ وہ حق خود ارادیت چاہتے ہیں اور جموں و کشمیر پر بھارت کے غیر قانونی قبضے کو مسترد کرتے ہیں۔

مزید پڑھیے: حریت رہنما مشتاق الاسلام بھارتی پولیس کے ہاتھوں گرفتار

تحریک جموں و کشمیر بچاؤ کی جانب سے چسپاں کیے گئے پوسٹروں میں کہا گیا ہے کہ کشمیری اپنے حق خودارادیت کا مطالبہ کر رہے ہیں جس کی انہیں اقوام متحدہ نے ضمانت دے رکھی ہے۔

پوسٹروں میں لوگوں پر زور دیا گیا کہ وہ اس دن کشمیر دشمن ظالمانہ قوانین، حد بندی کمیشن کی غیر منطقی تجاویز اور مقبوضہ علاقے میں مودی کے جنگی جرائم کے خلاف احتجاجی مظاہرے کریں۔

مزید پڑھیے: مقبوضہ کشمیر کی صورتحال انتہائی تشویشناک ہوچکی ہے

چسپاں کئے گئے پوسٹرز میں کہا گیا ہے کہ مودی حکومت جموں و کشمیر کی آئینی بنیادوں کو تباہ کر رہی ہے تاکہ جموں و کشمیر کی مسلم اکثریت کو اقلیت میں تبدیل کر کے علاقے میں ہندوتوا وزیر اعلیٰ مسلط کیا جا سکے۔