صوبائی وزیر صحت ڈاکٹر یاسمین راشد نے کہا ہے کہ نوازشریف اپنے آپ کو لیڈرسمجھتے ہیں تو وطن واپس آئیں۔

ڈاکٹریاسمین راشد نے الحمرا ہال میں محکمہ پرائمری اینڈ سیکنڈری ہیلتھ کئیرکے زیراہتمام ”عینک والاکورونا جن“شو میں بطورمہمان خصوصی شرکت کی جہاں انہوں نے سیکرٹری صحت عمران سکندربلوچ،سپیشل سیکرٹری صالحہ سعید اورڈائریکٹرسپیشل ایجوکیشن پرویزبٹ کو یاد گاری شیلڈزبھی دیں۔

اس موقع پر صوبائی وزیر صحت ڈاکٹر یاسمین راشد نے حاضرین سے خطاب کرتے ہوئے کہا کہ عوام میں ویکسی نیشن کی اہمیت اجاگرکرنے کیلئے منفرداور شانداراندازسے آگاہی پھیلانے پر سیکرٹری محکمہ پرائمری اینڈ سیکنڈری ہیلتھ کئیرعمران سکندربلوچ اوران کی ٹیم کو شاباش و مبارکباد دیتی ہوں۔

انہوں نے کہا کہ عینک والا کورونا جن کے تمام کرداروں نے شانداراندازمیں عوام میں ویکسی نیشن بارے آگاہی پھیلانے کی بہترین کوشش کی ہے، اللہ پاک کے کرم اور محکمہ صحت کی کاشوں کی بدولت پنجاب کی 53فیصد آبادی کو مکمل ویکسینیٹ کرچکے ہیں۔

صوبائی وزیر صحت کا کہنا تھا کہ پنجاب میں کورونا کے مثبت کیسزکی شرح0.3فیصدرہ گی ہے، پنجاب کی 8کروڑ60لاکھ آبادی کو کورونا سے بچاؤ کی ویکسین لگا چکے ہیں۔

ڈاکٹر یاسمین راشد نے کہا کہ ریچ ایوری ڈورویکسی نیشن مہم کے دوسرے مرحلے کے دوران پنجاب کی 70فیصدآبادی کو ویکسنیٹ کرنے کی پوری کوشش کررہے ہیں۔

انہوں نے کہا کہ پنجاب میں 8اسٹیٹ آف دی آرٹ مدراینڈ چائلڈ ہسپتال بنائے جارہے ہیں جبکہ وزیراعظم عمرا ن خان یکم جنوری سے پنجاب کے تمام3کروڑخاندانوں کو نیاپاکستان قومی صحت کارڈتقسیم کرنے جارہے ہیں۔

یاسمین راشد کا کہنا تھا کہ پنجاب میں نیاپاکستان قومی صحت کارڈ کیلئے زیادہ سے زیادہ سرکاری ونجی ہسپتالوں کو منتخب کیا جارہا ہے جبکہ گنگارام ہسپتال لاہورمیں بھی 650بستروں پر مشتمل مدراینڈ چائلڈ بلاک بنایا جارہا ہے، پنجاب کی آبادی کو ویکسینیٹ کرکے کورونا سے مکمل محفوظ بنائیں گے۔

صوبائی وزیر صحت ڈاکٹر یاسمین راشد کا مزید کہنا تھا کہ نوازشریف نے ابھی تک اپنی میڈیکل رپورٹس نہیں بھیجی ہیں۔ نوازشریف اپنے آپ کو لیڈرسمجھتے ہیں تو وطن واپس آئیں اور اپنے ملک میں آکر لیڈری کریں ولایت نہیں۔