وزارتِ مذہبی امور نے پاکستان ہندو مندر مینجمنٹ کمیٹی تشکیل دیدی ہے۔

پاکستان ہندو مندر مینجمنٹ کمیٹی کے افتتاحی اجلاس کی صدارت پیر نور الحق قادری نے کی۔

 چیئرمین متروکہ وقف املاک بورڈ کی نئی تشکیل شدہ ہندو مندر مینجمنٹ کمیٹی کو بریفنگ دیتے ہوئے بتایا گیا کہ پاکستان ہندو مندر مینجمنٹ کمیٹی ہندو عبادت گاہوں سے متعلق امور کی دیکھ بھال کرے گی۔

کرشن شرما، دیوان چاند چاولہ، ہارون سرب دیال، موہن داس،  نرنجن کمار ، میگھا اروڑا، امیت شادانی ،اشوک کمار، ورسی مل دیوانی اور امر ناتھ رندھاوا  کمیٹی ممبران میں شامل ہیں۔

وفاقی وزیر برائے مذہبی امور پیر نور الحق قادری نے کہا ہے کہ پاکستان کی غیر مسلم آبادی کے مسائل کو ترجیحی بنیادوں پر حل کر رہے ہیں ، کمیٹی کی تشکیل پاکستانی ہندو برادری  کے مسائل کے حل کیلئے  ممد و معاون ثابت ہو گی۔

پیر نور الحق قادری نے کہا کہ خطے میں مختلف تہذیب و ثقافت کے لوگوں کے درمیان ہم آہنگی  کے فروغ کے خواہاں ہیں ، مذہبی و ثقافتی تنوع کے باوجود ایک دوسرے کو برداشت اور قبول کرنا  ہی انسانیت ہے۔

انہوں نے کہا کہ شر پسند عناصر مذہب ، فرقہ اور لسانیت کی بنیاد پر پاکستان میں تصادم چاہتے ہیں ، نئی ہندو  کمیٹی غیرمسلم آبادی اور ریاست کے درمیان پل کا کام کرے گی ، ہندو کمیٹی حکومتی فلاحی منصوبوں سے متعلق گراس روٹ لیول  پر آگہی دے تاکہ غیر مسلم آبادی مستفید ہو سکے۔

وفاقی وزیر برائے مذہبی امور پیر نور الحق قادری نے کہا کہ وزیر اعظم عمران خان کے ویژن کے مطابق غیر مسلم آبادی کی فلاح و بہبود کے کیلئے کوشاں ہیں۔

پاکستان ہندو مندر مینجمنٹ کمیٹی کے صدر کرشن شرما نے کہا کہ آج سے قبل پاکستان میں مذہبی آزادی کے حوالے سے اتنا کام نہیں ہوا ،  ہندو برادری کے مسائل کے حل کیلئے پلیٹ فارم فراہم کرنے پر حکومت کے شکر گزار ہیں ، ہندو برادری کے دیرینہ مطالبے پر کمیٹی کی تشکیل سے حکومتِ پاکستان نے نئی تاریخ رقم کی۔

واضح رہے کہ پاکستان سکھ گردوارا پربندھک کمیٹی پہلے سے کام کر رہی ہے۔