شیخ رشید نے کہا ہے کہ منی بجٹ سے عوام پر صرف دو ارب کا بوجھ پڑے گا۔

وفاقی وزیر داخلہ شیخ رشید نے پارلیمانی اجلاس کے بعد میڈیا سے گفتگو کرتے ہوئے کہا ہے کہ عام آدمی پر سترہ فیصد جی ایس ٹی نہیں لگے گا ، تمام اتحادی حکومت کے ساتھ ہیں۔

دوسری جانب وفاقی وزیر داخلہ شیخ رشید احمد کے بھتیجے ممبر قومی اسمبلی و پارلیمانی سیکرٹری برائے نارکوٹکس  شیخ راشد شفیق نے میڈیا سے گفتگو کرتے ہوئے کہا کہ بلدیاتی الیکشن پر پارٹی نے جو فیصلہ کرنا ہے لال حویلی بھرپور حمایت کریگی۔

انہوں نے کہا کہ ایپنک سے لنک روڈ،نالہ لئی روڈ منظور ہوا ہے ، فروری تک ٹینڈر ہو جائیں گے ، ماں بچہ اسپتال جلد شروع ہو جائیگا ، آر آئی یو مخالفین کا اسپتال ہے لیکن ہم نے 35کروڑ کی لاگت سے مشینیں لگوائی ہیں تاکہ غریب کا مفت علاج ہوسکے۔

ممبر قومی اسمبلی و پارلیمانی سیکرٹری برائے نارکوٹکس نے کہا کہ ڈی ایچ کیو اسپتال میں بھی وارڈ بنا رہے ہیں تاکہ غریب کا علاج ہو ، مہنگائی کا ایشو پوری دنیا میں ہے ، وزیراعظم عمران خان کام کر رہے ، مہنگائی کو نیچے لائیں گے۔

شیخ راشد شفیق نے کہا کہ چودہ سال پہلے بھی نالہ لئی کا افتتاح کیا اس کا نام شیخ رشید ایکسپریس وے رکھا ، چھ ہزار کنال اراضی کو کم کر کے 600کنال پر لے آئیں ہیں ، نالہ لئی ایکسپریس وے بننے سے ٹریفک کا مسئلہ حل ہو جائیگا۔

انہوں نے کہا کہ پورے شہر میں یونیورسٹیاں بنا دی ہیں ، ہمارا ووٹ بینک بڑا ہے ، دو حلقوں میں ہمارے مسئلے ہیں اگر ہم مل کر الیکشن لڑیں گے تو ہمیں کوئی ہرا نہیں سکتا۔

فیاض الحسن چوہان نے شیخ رشید سے کہا کہ ہم مل کر مضبوط امیدوار لیکر آئیں گے جس پر بات کرتے ہوئے شیخ راشد شفیق نے کہا کہ راولپنڈی کے تمام علاقوں سے گیس بحران ختم ہو جائیگا۔