امیر جماعت اسلامی سراج الحق نے کہا ہے کہ 41سال بعد ہونے والے اجلاس میں مسئلہ کشمیر پر خاموش رہنا مجرمانہ غفلت ہے اور باعث شرم ہے۔

جماعت اسلامی کے امیر سراج الحق نے اپنے بیان میں کہا ہے کہ او آئی سی اجلاس خوش آئند لیکن کشمیر پر بات نہ کرنا لمحہ فکریہ ہے، کشمیر پاکستان کی شہ رگ ہے۔

سراج الحق نے کہا کہ او آئی سی اجلاس میں مقبوضہ کشمیر پر خاموشی اختیار کرنا باعث شرم ہے، 41سال بعد ہونے والے اجلاس میں مسئلہ کشمیر پر خاموش رہنا مجرمانہ غفلت ہے۔

امیر جماعت اسلامی سراج الحق نے کہا کہ افغانستان میں بحران کا باعث بننے والی بیرونی طاقتیں اب عملی تعاون کریں، مدعی اگر سست ہو تو بیرونی دنیا کسی بھی مسئلے پر تعاون نہیں کر سکتی۔

انہوں نے کہا کہ حکومت نے کشمیر کوایجنڈے میں شامل نہ کر کے کس کو راضی کرنے کی کوشش کی ہے؟ اچھا موقع تھا افغانستان کی حکومت تسلیم کر کے پوری دنیا پر پریشر ڈالا جاتا لیکن ایسا نہیں کیا گیا۔

سراج الحق کا کہنا تھا کہ مسلم ممالک کی خارجہ پالیسی بھی آزاد نہیں ہے، افغان عوام کی فتح کے بعد فلسطین اور کشمیرمیں آزادی کا سورج جلد طلوع ہو گا۔